ڈیٹ مارکیٹ میں اصلاحات کیلئے ایس ای سی پی کا اعلیٰ سطح کا ورکنگ گروپ قائم

سیکیورٹیز اینڈ ایکسچینج کمیشن آف پاکستان (ایس ای سی پی) نے ملکی کارپوریٹ قرضوں کی مارکیٹ کی بہتری و جامع جائزے اور کارپوریٹ بانڈز و سکوک کے اجراء کا عمل آسان اور تیز تر بنانے کے لیے ایک اعلیٰ سطحی ورکنگ گروپ تشکیل دیا ہے۔

ایس ای سی پی کے کمشنر محمد علی فرید خواجہ کی سربراہی میں قائم یہ ورکنگ گروپ ڈیٹ مارکیٹ میں اصلاحات کے لیے اپنی سفارشات پیش کرے گا۔30 جولائی 2026 کے نوٹس میں ایس ای سی پی نے کہا کہ طویل المدتی سرمایہ کاری، مالیاتی ذرائع میں تنوع اور سرمایہ کاری کے مواقع وسیع کرنے کے لیے ایک فعال اور ترقی یافتہ کارپوریٹ ڈیٹ مارکیٹ کی اشد ضرورت ہے۔ مارکیٹ کے شرکاء سے ملنے والی معلومات ظاہر کرتی ہیں کہ کارپوریٹ ڈیٹ انسٹرومینٹس کے اجراء کے طویل اور پیچیدہ مراحل اور ان کے بھاری اخراجات اس مارکیٹ کی ترقی میں بڑی رکاوٹ ہیں۔ نوٹس کے مطابق ایس ای سی پی اس ورکنگ گروپ کو تشکیل دیتا ہے، تاکہ کارپوریٹ ڈیٹ مارکیٹ کا جامع جائزہ لیا جائے اور کارکردگی کو بہتر بنانے، اجراء کے وقت اور اخراجات کو کم کرنے اور مارکیٹ میں شمولیت کو فروغ دینے کے لیے دستاویزات کو یکساں بنانے کی عملی سفارشات پیش کی جائیں۔

• ورکنگ گروپ کے ٹی او آرز
• موجودہ کریڈٹ ریٹنگ فریم ورک کا جائزہ لینا اور شفافیت، کارکردگی اور مارکیٹ کے اعتماد میں اضافے کے اقدامات کی نشاندہی کرنا۔
• اجراء کے وقت، اخراجات اور مارکیٹ تک رسائی پر کریڈٹ ریٹنگ کے الزامات و شرائط کا اثر پرکھنا۔
• ریٹنگ کے عمل کو آسان بنانے اور ریٹنگ پروڈکٹس میں جدت لانے کے لیے اصلاحات کی سفارش کرنا۔
• پرائیویٹ اور پبلک کارپوریٹ ڈیٹ سیکیورٹیز کے اجراء کے پورے عمل کا شروع سے آخر تک جائزہ لینا۔
• اجراء کے ہر مرحلے میں لگنے والے وقت کا تخمینہ لگانا اور قانونی، ریگولیٹری و عملی رکاوٹوں کو تلاش کرنا۔
• اجراء کے کل اخراجات بشمول ریگولیٹری فیس، پیشہ ورانہ چارجز، لسٹنگ اخراجات، ٹیکس اور دیگر اخراجات کا جائزہ لینا اور انہیں مناسب بنانے کی سفارش کرنا۔
• قانونی و ریگولیٹری شرائط کا جائزہ لے کر ایک جیسے معیاری دستاویزات کی ڈرافٹنگ کرنا اور ضرورت پڑنے پر ریگولیٹری فریم ورک میں ترمیم کی تجاویز دینا۔
• کارپوریٹ ڈیٹ انسٹرومنٹس پر لاگو موجودہ ٹیکس نظام کا جائزہ لینا اور ٹیکس کی رکاوٹوں کو دور کرکے مارکیٹ کو مزید کشش فراہم کرنا۔
• مارکیٹ کے متعلقہ شرکاء سے مشاورت کرنا اور پاکستان کے فریم ورک کا بین الاقوامی بہترین طریقہ کار سے موازنہ کرنا۔
• سکوک کے اجراء پر لاگو ریگولیٹری اور شرعی فریم ورک کا جائزہ لینا۔
• سکوک کے اجراء میں حائل شرعی، قانونی اور عملی رکاوٹوں کی نشاندہی کرنا (بشمول وہ وجوہات جو اخراجات اور وقت میں اضافے کا باعث بنتی ہیں)۔
• اسلامی کارپوریٹ ڈیٹ مارکیٹ کے پھیلاؤ، کارکردگی میں بہتری اور یکساں اسٹرکچر کو فروغ دینے کے لیے اصلاحات کی سفارش کرنا۔

اس گروپ میں وزارتِ خزانہ، بینکوں، مالیاتی اداروں، کریڈٹ ریٹنگ ایجنسیوں اور مارکیٹ کے دیگر اہم فریقین (اسٹیک ہولڈرز) کے نمائندے شامل ہیں۔ایس ای سی پی کے چیئرمین ڈاکٹر کبیر احمد سدھو کا کہنا تھا کہ کارپوریٹ ڈیٹ مارکیٹ کو فروغ دینا اور مضبوط بنانا ہماری اہم ترین ترجیح ہے۔ ایک مضبوط اور مستحکم ڈیٹ مارکیٹ سے انڈسٹری اور حکومت دونوں کو طویل المدتی سرمایہ دستیاب ہو سکے گا۔