شیخ حسینہ کے نئی دہلی میں مجوزہ خطاب پر بنگلہ دیش کا بھارت سے وضاحت کا مطالبہ

بنگلہ دیش نے بھارت سے مطالبہ کیا ہے کہ وہ نئی دہلی سے سابق وزیر اعظم شیخ حسینہ کے مجوزہ ورچوئل خطاب کے معاملے پر اپنا مؤقف واضح کرے۔ ڈھاکا نے خبردار کیا ہے کہ ایک مفرور سیاسی رہنما کو بھارت کی سرزمین سے سیاسی سرگرمیوں کی اجازت دینا دونوں ممالک کے درمیان بہتر ہوتے تعلقات کو متاثر کر سکتا ہے۔

یہ بنگلہ دیش کا شیخ حسینہ کے مجوزہ خطاب پر پہلا باضابطہ ردعمل ہے، جو 5 اگست کو نئی دہلی میں فارن کوریسپونڈنٹس کلب آف ساؤتھ ایشیا (ایف سی سی ایس اے) کے زیر اہتمام ایک تقریب میں ویڈیو لنک کے ذریعے متوقع ہے۔ یہ تقریب طلبہ کی قیادت میں ہونے والی اس تحریک کے دو سال مکمل ہونے پر منعقد کی جا رہی ہے جس کے نتیجے میں حسینہ واجد کی حکومت کا خاتمہ ہوا تھا۔

بنگلہ دیش مسلسل بھارت سے شیخ حسینہ کی حوالگی کا مطالبہ کر رہا ہے، جو اگست 2024 میں حکومت کے خاتمے کے بعد بھارت میں مقیم ہیں۔ حسینہ نے ایک انٹرویو میں کہا تھا کہ وہ دسمبر میں بنگلہ دیش واپس آنے کا ارادہ رکھتی ہیں۔

بنگلہ دیش کی وزیر مملکت برائے خارجہ امور شمع اوبید اسلام نے صحافیوں سے گفتگو کرتے ہوئے کہا کہ ڈھاکا بھارت کے ساتھ تعلقات کو آگے بڑھانا چاہتا ہے اور نہیں چاہتا کہ یہ پیش رفت متاثر ہو۔

انہوں نے کہا کہ بھارت کو اپنے مؤقف کے بارے میں واضح ہونا ہوگا۔

ایف سی سی ایس اے کے مطابق 78 سالہ شیخ حسینہ تقریب میں اپنے بیٹے سجیب واجد جوئے اور دیگر مقررین کے ہمراہ ویڈیو لنک کے ذریعے خطاب کریں گی۔

شمع اسلام نے کہا کہ بنگلہ دیش نے متعدد بار بھارت کو اپنے تحفظات سے آگاہ کیا ہے کہ حسینہ واجد اور عوامی لیگ کے دیگر رہنما بھارتی سرزمین سے سیاسی بیانات دے رہے ہیں۔

انہوں نے کہا کہ بنگلہ دیش نہیں چاہتا کہ مفرور ملزمان کے بیانات سے دونوں ممالک کے تعلقات متاثر ہوں۔

بھارتی وزارت خارجہ کی جانب سے فوری طور پر کوئی ردعمل سامنے نہیں آیا۔ حسینہ واجد کی برطرفی کے بعد دونوں ممالک کے تعلقات میں کشیدگی پیدا ہوئی، تاہم حالیہ عرصے میں دونوں جانب سے تعلقات بہتر بنانے کے اشارے دیے گئے ہیں۔