ٹرمپ کے جنگ بندی میں پیش رفت کے دعوے کے باوجود غزہ میں اسرائیلی حملے، 4 فلسطینی شہید

غزہ پر اسرائیلی فضائی حملوں کا سلسلہ اتوار کو مسلسل دوسرے روز بھی جاری رہا، جس کے نتیجے میں کم از کم 4 فلسطینی شہید ہوگئے، حالانکہ امریکی صدر ڈونلڈ ٹرمپ نے غزہ جنگ بندی معاہدے پر عملدرآمد کی کوششوں میں پیش رفت کا دعویٰ کیا تھا۔

فلسطینی طبی حکام کے مطابق اسرائیلی جنگی طیاروں نے غزہ سٹی اور دیر البلح میں الگ الگ حملے کیے۔ وسطی غزہ کے علاقے دیر البلح میں ایک رہائشی اپارٹمنٹ پر فضائی حملے میں ایک شخص اور اس کی اہلیہ جاں بحق جبکہ 4 افراد زخمی ہوئے۔ غزہ سٹی میں ایک اور اپارٹمنٹ پر حملے میں ایک بچے سمیت 2 افراد مارے گئے۔

امریکی صدر ٹرمپ نے جمعرات کو کہا تھا کہ گزشتہ سال مصر میں طے پانے والے غزہ جنگ بندی معاہدے پر عملدرآمد کے لیے حماس کی جانب سے امریکی حمایت یافتہ اقدام کے تحت ہتھیار ڈالنے پر آمادگی کے بعد اہم پیش رفت ہوئی ہے۔

جمعہ کو ٹرمپ کے بورڈ آف پیس نے معاہدے پر عملدرآمد کے آخری مراحل کے لیے 15 نکاتی روڈ میپ جاری کیا تھا، تاہم اس پر ابھی عملدرآمد شروع نہیں ہوا۔

حماس کا کہنا ہے کہ وہ اپنے ہتھیار صرف اسی صورت میں ذخیرہ کرنے کے لیے حوالے کرے گی جب اسرائیل فوجی کارروائیاں روک کر گزشتہ معاہدے کے مطابق اپنی افواج واپس بلائے گا۔ دوسری جانب اسرائیلی حکام کا کہنا ہے کہ حماس کے حقیقی طور پر غیر مسلح ہونے تک فوجی پوزیشنز سے انخلا نہیں کیا جائے گا۔

سابق اعلیٰ فتح رہنما محمد دحلان نے کہا ہے کہ امریکی نمائندے غزہ پر حملے روکنے کے لیے اسرائیلی فریق سے رابطے میں ہیں، جبکہ معاہدے کی مکمل عملداری کا دارومدار اسرائیل کی جانب سے روزانہ حملے ختم کرنے پر ہے۔