فیلڈ مارشل عاصم منیر کا بلوچستان میں دہشت گردوں کے خلاف کارروائیاں جاری رکھنے کا عزم
- فیلڈ مارشل کا کہنا ہے کہ بلوچستان میں پائیدار امن سکیورٹی فورسز کی مسلسل کارروائیوں سے ہی ممکن ہوگا
چیف آف ڈیفنس فورسز (سی ڈی ایف) فیلڈ مارشل سید عاصم منیر نے جمعرات کو کہا ہے کہ دہشت گردی اور اس کے سہولت کاروں کے مکمل خاتمے تک سکیورٹی فورسز دہشت گرد گروہوں کے خلاف ہدفی کارروائیاں جاری رکھیں گی۔
پاک فوج کے شعبۂ تعلقات عامہ (آئی ایس پی آر) کے مطابق راولپنڈی میں جنرل ہیڈکوارٹرز میں منعقدہ 20ویں نیشنل ورکشاپ بلوچستان کے شرکا سے خطاب کرتے ہوئے فیلڈ مارشل نے کہا کہ بلوچستان میں پائیدار امن سکیورٹی فورسز اور قانون نافذ کرنے والے اداروں کی مسلسل کوششوں اور عوامی تعاون سے ہی ممکن ہوگا۔
انہوں نے کہا کہ پاکستان جہاں کہیں بھی دہشت گردوں کا ڈھانچہ ملک اور عوام کے لیے خطرہ بنے گا، اسے ختم کرنے کے لیے پُرعزم ہے۔
فیلڈ مارشل عاصم منیر نے کہا کہ بیرونی سرپرستی میں کام کرنے والے پراکسی عناصر نے بلوچستان میں تشدد کو ہوا دینے اور امن و استحکام کو نقصان پہنچانے کی کوشش کی، تاہم عوام کے تعاون سے مسلح افواج کے مضبوط ردعمل کے ذریعے ان سازشوں کو ناکام بنایا جائے گا۔
انہوں نے بلوچستان کو قدرتی وسائل سے مالا مال اورحوصلہ مند عوام کا حامل صوبہ قرار دیتے ہوئے کہا کہ وفاقی اور صوبائی حکومتیں جامع حکمت عملی کے تحت صوبے کی سماجی و معاشی بہتری کے لیے مختلف ترقیاتی منصوبوں پر عمل پیرا ہیں۔
فیلڈ مارشل نے قومی یکجہتی کے فروغ اور بلوچستان میں دیرپا امن و خوشحالی کے لیے سول سوسائٹی، تعلیمی حلقوں، میڈیا اور نوجوانوں کے کردار کو بھی سراہا۔
انہوں نے ملکی ترقی کے سفر کو آگے بڑھانے کے لیے قومی اتحاد اور ثابت قدمی کی اہمیت پر زور دیا۔
آئی ایس پی آر کے مطابق ورکشاپ کے اختتام پر شرکا کے ساتھ سوال و جواب کی نشست منعقد ہوئی، جس میں انہوں نے پاکستان کے استحکام، ترقی اور خودمختاری کے لیے اپنے عزم کا اعادہ کیا۔
Comments