بحرین کا ایرانی حملے ناکام بنانے کا دعویٰ
- امریکا اور ایران کے درمیان کشیدگی میں مزید اضافہ ہوگیا
بحرین کی دفاعی فورس نے بدھ کو کہا کہ ملک کے فضائی دفاعی نظام نے ایران کے فضائی حملوں کو ناکام بنا دیا۔ فورس نے تہران پر الزام عائد کیا کہ وہ بحرین کو نشانہ بنانے کی منظم دشمنانہ پالیسی جاری رکھے ہوئے ہے۔ بحرین میں امریکی بحریہ کا پانچواں بیڑا بھی تعینات ہے۔
امریکا اور ایران کے درمیان کشیدگی میں اضافہ ہو گیا ہے۔
منگل کو ایران کے پاسدارانِ انقلاب نے کہا کہ انہوں نے بحرین کے شیخ عیسیٰ ایئر بیس پر امریکی فوج کے ریڈار نظام کو ڈرونز سے نشانہ بنایا۔ ان کے مطابق یہ کارروائی امریکی فوجی ڈرونز کی جانب سے ایرانی فضائی حدود کی مسلسل خلاف ورزیوں کے جواب میں کی گئی۔
بحرین اور امریکا نے کہا کہ ایرانی حملے کو راستے میں ہی ناکام بنادیا گیا۔
بعد ازاں منگل کو امریکا نے ایران کے ایک میزائل لانچنگ اڈے کو نشانہ بنایا۔
یہ حملے ایران اور ثالثی کرنے والے ممالک عمان اور قطر کے درمیان مذاکرات کے باوجود کیے گئے۔
بحرین کی وزارت داخلہ نے بدھ کو خطرے سے متعلق دو انتباہات جاری کرتے ہوئے شہریوں کو قریبی محفوظ مقام پر منتقل ہونے کی ہدایت کی، تاہم دونوں انتباہات کے بعد صورتحال معمول پر آنے کا اعلان بھی کیا گیا۔
دوسری جانب کویتی فوج نے ایک بیان میں کہا کہ بدھ کی صبح کویت کے فضائی دفاعی نظام بھی دشمن کے ڈرون حملوں کا مقابلہ کررہے تھے، تاہم اس حوالے سے مزید تفصیلات فراہم نہیں کی گئیں۔
ایرانی سرکاری میڈیا کے مطابق، ایران کی فوج نے بدھ کو کہا کہ اس نے کویت کے علی السالم ایئر بیس پر امریکی ڈرون اور میزائل تنصیبات کو نشانہ بنایا ہے۔




















Comments