پٹرولیم ڈیلرز کی روزانہ قیمتوں کے تعین کے نظام کی حمایت، مارجن میں اضافے کا مطالبہ

پٹرولیم ڈیلرز نے پٹرولیم مصنوعات کی قیمتوں میں روزانہ کی بنیاد پر ردو بدل کے حکومتی منصوبے کی حمایت کر دی ہے۔

ڈیلرز کا کہنا ہے کہ اس اقدام سے شفافیت آئے گی اور مارکیٹ کی خرابیوں کا خاتمہ ہوگا، جبکہ اس کے ساتھ ہی انہوں نے اپنے منافع (ڈیلرز مارجن) میں اضافے کا مطالبہ بھی دہرایا ہے۔پٹرولیم ڈیلرز کی جانب سے یہ حمایت وفاقی وزیر برائے پٹرولیم علی پرویز ملک اور پاکستان پٹرولیم ڈیلرز ایسوسی ایشن (پی پی ڈی اے) کے وفد کے درمیان ہونے والی ملاقات میں سامنے آئی، جس کی قیادت چیف ایڈوائزر ملک خدا بخش کر رہے تھے۔ پٹرولیم ڈویژن کی جانب سے جاری بیان کے مطابق وفاقی وزیر نے وفد کو ہفتہ وار سے روزانہ کی بنیاد پر قیمتوں کے اعلان کے حکومتی فیصلے پر بریفنگ دی۔

نئے طریقہ کار کے تحت پٹرولیم مصنوعات کی قیمتوں کا تعین عالمی مارکیٹ میں تیل کی قیمتوں کے سات روزہ اوسط (رولنگ ایوریج) کی بنیاد پر کیا جائے گا۔ وفاقی وزیر علی پرویز ملک نے بتایا کہ موجودہ ہفتہ وار فارمولا بھی سات روزہ اوسط پر ہی مبنی تھا، تاہم روزانہ کی بنیاد پر قیمتیں اپ ڈیٹ کرنے سے بین الاقوامی مارکیٹ کے رجحانات کا بہتر عکس نظر آئے گا، شفافیت بڑھے گی اور مارکیٹ میں ہیرا پھیری اور ایندھن کی ذخیرہ اندوزی کے مواقع کم ہوں گے۔

پی پی ڈی اے نے اس مجوزہ طریقہ کار کا خیرمقدم کرتے ہوئے حکومت کے اصلاحاتی ایجنڈے کی حمایت کا عزم ظاہر کیا۔ ڈیلرز نے آبنائے ہرمز کے بحران کے دوران پٹرولیم مصنوعات کی فراہمی کو یقینی بنانے پر حکومت کو سراہا اور کہا کہ علاقائی رکاوٹوں کے باوجود پاکستان میں ایندھن کی بلاتعطل فراہمی برقرار رہی۔ ملک خدا بخش کا کہنا تھا کہ حکومت کے بروقت اقدامات نے ایندھن کی اس قلت کو روکنے میں مدد دی جس نے کئی ہمسایہ ممالک میں امن و امان کے مسائل پیدا کر دیے تھے۔

ملاقات کے دوران ڈیلرز ایسوسی ایشن نے حکومت پر زور دیا کہ آئل مارکیٹنگ کمپنیوں (او ایم سیز) اور ڈیلرز کے تعلقات کے حوالے سے قواعد و ضوابط طے کرتے وقت پٹرولیم ڈیلرز سے مشاورت کی جائے۔ وفد نے ڈیلرز مارجن کو بڑھا کر 8 فیصد کرنے کی بھی درخواست کی اور مؤقف اختیار کیا کہ ان کے مارجن میں طویل عرصے سے کوئی ترمیم نہیں کی گئی۔وزیرِ پٹرولیم نے وفد کو یقین دلایا کہ ان کے تحفظات پر غور کیا جائے گا۔ انہوں نے اعلان کیا کہ پی پی ڈی اے کے نمائندے منگل کو آئل اینڈ گیس ریگولیٹری اتھارٹی (اوگرا) کے حکام سے ملاقات کریں گے، تاکہ مارجن کے معاملے اور دیگر آپریشنل امور پر تفصیلی بات چیت کی جا سکے۔ وفاقی وزیر نے مثبت بات چیت پر ایسوسی ایشن کا شکریہ ادا کیا اور عوامی مفاد کے تحفظ کے ساتھ ساتھ ایک شفاف، مسابقتی اور صارفین دوست پٹرولیم مارکیٹ بنانے کے حکومتی عزم کا اعادہ کیا۔