سیلیکٹ ٹیکنالوجیز نے کامیاب آئی پی او کے ذریعے 3.02 ارب روپے حاصل کر لیے

اسمارٹ فونز اور گھریلو برقی آلات بنانے والی پاکستانی کمپنی سیلیکٹ ٹیکنالوجیز لمیٹڈ (سیلیکٹ) نے ابتدائی عوامی شیئرز کی فروخت (آئی پی او) کامیابی سے مکمل کرتے ہوئے 3.02 ارب روپے حاصل کر لیے۔ پاکستان اسٹاک ایکسچینج (پی ایس ایکس) کے مطابق اس کامیابی میں ادارہ جاتی اور ریٹیل سرمایہ کاروں کی بھرپور دلچسپی نے اہم کردار ادا کیا ہے۔

کمپنی نے اپنے اجرا کے بعد ادا شدہ سرمایہ کے 10 فیصد کے مساوی 8 کروڑ 89 لاکھ عام حصص فروخت کے لیے پیش کیے۔ بک بلڈنگ کے عمل کے دوران حصص کی حتمی قیمت 34 روپے فی شیئر مقرر ہوئی، جو 28 روپے کی کم از کم قیمت سے 21 فیصد زیادہ تھی۔

کمپنی کے مطابق آئی پی او کو 3.23 گنا زائد درخواستیں موصول ہوئیں، جبکہ تقریباً 13 ہزار سرمایہ کاروں نے اس میں حصہ لیا۔ ان میں کمرشل بینک، میوچل فنڈز، انشورنس کمپنیاں، سرمایہ کاری بینک، پنشن اور ملازمین کے فنڈز، بروکریج ہاؤسز، کارپوریٹ سرمایہ کار، اعلیٰ مالیت کے حامل افراد اور ریٹیل سرمایہ کار شامل تھے۔

کمپنی کا کہنا ہے کہ حاصل ہونے والی رقم پیداواری صلاحیت بڑھانے، نئی مصنوعات کی تیاری میں جدت لانے اور پاکستان کے کنزیومر ٹیکنالوجی شعبے میں اپنی مارکیٹ پوزیشن مزید مستحکم کرنے پر خرچ کی جائے گی۔

پی ایس ایکس میں منعقدہ گونگ تقریب سے خطاب کرتے ہوئے منیجنگ ڈائریکٹر اور چیف ایگزیکٹو فرخ ایچ سبزواری نے کہا کہ سیلیکٹ کی فہرست بندی نئے مالی سال کا پہلا آئی پی او ہے، جو پاکستان کے ٹیکنالوجی مینوفیکچرنگ شعبے پر سرمایہ کاروں کے بڑھتے ہوئے اعتماد کی عکاسی کرتا ہے۔

انہوں نے بتایا کہ مالی سال 2026 کے دوران 11 آئی پی اوز کے ذریعے 6 کروڑ 60 لاکھ ڈالر سرمایہ حاصل کیا گیا، جو گزشتہ 25 برسوں میں تیسرا بڑا سالانہ ہندسہ ہے، جبکہ سرمایہ کاروں کے اکاؤنٹس کی تعداد ریکارڈ 5 لاکھ 83 ہزار 52 تک پہنچ گئی۔

سیکیورٹیز اینڈ ایکسچینج کمیشن آف پاکستان (ایس ای سی پی) کے کمشنر ذیشان رحمان خٹک نے کہا کہ ریگولیٹر سرمایہ کاروں کے تحفظ کو یقینی بناتے ہوئے فہرست بندی کے عمل کو مزید مؤثر بنانے اور ابھرتے ہوئے شعبوں کی کمپنیوں کو سرمایہ مارکیٹ سے سرمایہ حاصل کرنے کی ترغیب دینے کے لیے پُرعزم ہے۔

ایئرلنک کمیونیکیشن لمیٹڈ کے چیئرمین اسلم ایچ پیراچا نے کہا کہ کامیاب فہرست بندی کمپنی کی حکمت عملی پر سرمایہ کاروں کے اعتماد کا مظہر ہے اور یہ مضبوط کارپوریٹ گورننس اور شفافیت کے عزم کی توثیق کرتی ہے۔

سیلیکٹ ٹیکنالوجیز کے چیف ایگزیکٹو عدنان آفتاب نے اس فہرست بندی کو کمپنی کی ترقی میں ایک اہم سنگ میل قرار دیتے ہوئے کہا کہ اس سے طویل المدتی توسیعی منصوبوں کو تقویت ملے گی اور پاکستان کی کنزیومر ٹیکنالوجی صنعت میں کمپنی کا کردار مزید مضبوط ہوگا۔

آئی پی او کے لیڈ منیجر عارف حبیب لمیٹڈ کے مطابق ادارہ جاتی اور ریٹیل سرمایہ کاروں کی بھرپور دلچسپی اس بات کا ثبوت ہے کہ سرمایہ کاروں کو سیلیکٹ کے کاروباری ماڈل اور پاکستان کی سرمایہ مارکیٹ کی بڑھتی ہوئی گہرائی پر اعتماد حاصل ہے۔