لی پین کی نااہلی کا فیصلہ قریب، فرانس کی انتہائی دائیں بازو کی سیاست دوراہے پر

فرانس کی انتہائی دائیں بازو کی رہنما میرین لی پین کی سیاسی قسمت کا اہم فیصلہ 7 جولائی کو متوقع ہے، جب ایک اپیل عدالت ان پر عائد انتخابی پابندی کے خلاف دائر درخواست پر فیصلہ سنائے گی۔ اس فیصلے سے یہ طے ہوگا کہ آیا لی پین 2027 کے صدارتی انتخابات میں حصہ لے سکیں گی یا ان کی جگہ ان کے سیاسی جانشین جورڈن بارڈیلا نیشنل ریلی (آر این) کے امیدوار ہوں گے۔

57 سالہ لی پین کو مارچ 2025 میں یورپی پارلیمنٹ کے فنڈز میں خردبرد کے جرم میں پانچ سال کے لیے عوامی عہدہ رکھنے سے نااہل قرار دیا گیا تھا، جبکہ انہیں چار سال قید کی سزا بھی سنائی گئی تھی۔ تاہم انہوں نے اس فیصلے کے خلاف اپیل کر رکھی ہے۔ اس مقدمے نے فرانس سمیت عالمی سطح پر بھی توجہ حاصل کی تھی، جبکہ امریکی صدر ڈونلڈ ٹرمپ سمیت کئی دائیں بازو کے رہنماؤں نے فیصلے پر تنقید کی تھی۔

نیشنل ریلی اس وقت رائے عامہ کے جائزوں میں نمایاں پوزیشن رکھتی ہے، اس لیے عدالت کے فیصلے کو آئندہ صدارتی انتخابات کے لیے انتہائی اہم قرار دیا جا رہا ہے۔ اگر لی پین نااہل رہتی ہیں تو 30 سالہ بارڈیلا پارٹی کے صدارتی امیدوار بن سکتے ہیں۔

پارٹی رہنماؤں کا کہنا ہے کہ لی پین اور بارڈیلا متحد ہیں اور 7 جولائی کے بعد کی حکمت عملی مشترکہ طور پر طے کی جا رہی ہے، تاہم بعض ذرائع کے مطابق دونوں کے معاشی نظریات میں اختلافات موجود ہیں۔ بارڈیلا نسبتاً آزاد منڈی کی معیشت کے حامی سمجھے جاتے ہیں۔

حالیہ سرویز کے مطابق لی پین اور بارڈیلا دونوں 2027 کے صدارتی انتخاب کے پہلے مرحلے میں کامیابی حاصل کر کے رن آف مرحلے میں پہنچ سکتے ہیں، جبکہ بعض جائزوں میں بارڈیلا کی مقبولیت لی پین سے بھی زیادہ دکھائی گئی ہے۔

سیاسی مبصرین کے مطابق 7 جولائی کا عدالتی فیصلہ نہ صرف لی پین کے سیاسی مستقبل بلکہ فرانس کی دائیں بازو کی سیاست کی سمت کا بھی تعین کرے گا۔