سعودی نیوم بندرگاہ خلیجی درآمدکنندگان کیلئے متبادل راستہ بن گئی

ایران جنگ اور آبنائے ہرمز کی مؤثر بندش کے باعث خلیجی خطے میں سپلائی چین شدید متاثر ہو رہی ہے، جس کے نتیجے میں قطر کی ڈسٹری بیوشن کمپنی سلام اسٹوڈیو اینڈ اسٹورز نے سامان کی ترسیل کے لیے ایک نیا اور کم استعمال ہونے والا راستہ اختیار کر لیا۔

کمپنی کو صرف ایک ماہ بعد ہی اپنی معمول کی ریڈ بل کی کھیپ موصول ہونا بند ہو گئی، جبکہ اس کی مصنوعات بھارت اور سری لنکا کی بندرگاہوں پر پھنس کر رہ گئیں۔ دوسری جانب خلیجی تجارتی مراکز بھی ایرانی حملوں اور گنجائش کی کمی کے باعث مشکلات کا شکار ہیں۔

مارکیٹ شیئر برقرار رکھنے کے لیے کمپنی نے یورپ سے سامان سعودی عرب کی نیوم بندرگاہ کے ذریعے دوحہ منتقل کرنے کا تجربہ کیا۔ کمپنی کے ڈائریکٹر آف ڈسٹری بیوشن ایڈم ملا کے مطابق یہ راستہ معمول کے مقابلے میں تیز ثابت ہوا اور سامان صرف 22 دن میں منزل تک پہنچ گیا، جو عام طور پر لگنے والے وقت کا تقریباً نصف ہے۔

کامیاب تجربے کے بعد کمپنی نے مزید 15 ٹرکوں کے ذریعے سامان منگوانے کا فیصلہ کیا۔ تاہم فی ٹرک لاگت تقریباً 10 ہزار ڈالر رہی، جو جنگ سے قبل سمندری راستے سے تقریباً 2,500 ڈالر تھی۔

سعودی ولی عہد محمد بن سلمان کے منصوبے نیوم کی بندرگاہ خود کو یورپ اور خلیجی ممالک کے درمیان ایک تیز تر تجارتی راہداری کے طور پر متعارف کرا رہی ہے۔ تاہم شپنگ ڈیٹا کے مطابق اس بندرگاہ کا استعمال ابھی محدود ہے اور یہ بڑے پیمانے پر سپلائی مسائل کا مکمل حل نہیں بن سکی۔

کمپنی کے مطابق جدہ بندرگاہ پر رش کے مقابلے میں نیوم کی سب سے بڑی کشش اس کا کم ٹریفک ہونا ہے۔