یوکرین پر روسی حملے، ایک شخص ہلاک، 30 سے زائد زخمی

روسی افواج نے رات کے وقت یوکرین پر ڈرونز، فضائی حملوں اور گولہ باری کے ذریعے بڑے حملے کیے جن میں جنوبی شہر اوڈیسا اور جنوب مشرقی شہر دنیپرو کو نشانہ بنایا گیا۔ یوکرینی حکام کے مطابق ان حملوں میں ایک شخص ہلاک جبکہ 30 سے زائد افراد زخمی ہوئے ہیں۔

اوڈیسا کے علاقائی فوجی انتظامیہ کے سربراہ سیرہی لِساک کے مطابق ڈرون حملوں میں رہائشی عمارتیں، ایک اسکول اور ایک کنڈرگارٹن بھی متاثر ہوئے۔ حملے کے نتیجے میں ایک 11 سالہ لڑکا اور 59 سالہ مرد زخمی ہوئے۔

دوسری جانب دنیپرو شہر پر میزائل حملے کیے گئے جن میں 18 افراد زخمی ہوئے، جن میں دو بچے بھی شامل ہیں۔ زخمیوں میں دو سال کی بچی اور 10 سال کا لڑکا بھی شامل ہے۔

زاپوریژیا کے علاقے میں بھی رات گئے حملوں کے دوران تین افراد زخمی ہوئے، جبکہ خرسون میں ہونے والے حملوں میں ایک شخص ہلاک اور نو افراد زخمی ہوئے۔

روسی حکام کے مطابق روس کے اندر بھی رات کے وقت کئی علاقوں میں یوکرینی ڈرونز مار گرائے گئے۔

دونوں ممالک عام شہریوں کو نشانہ بنانے سے انکار کرتے ہیں۔