قومی ایئرلائن میں بڑی پیش رفت، فوجی فرٹیلائزر بطور شیئر ہولڈر شامل

عارف حبیب کنسورشیم نے پی آئی اے ایکویٹی لمیٹڈ(پی آئی اے ای ایل) کے نام سے خصوصی ذیلی ادارہ (ایس وی پی ) تشکیل دیا ہے، جس میں فوجی فرٹیلائزر کمپنی لمیٹڈ (ایف ایف سی ایل) بطور شیئر ہولڈر شامل ہو گئی ہے۔

اب پی آئی اے ایکویٹی لمیٹڈ پاکستان انٹرنیشنل ایئر لائنز (پی آئی اے) کے 100 فیصد حصص کی مالک ہوگی۔ فوجی فرٹیلائزر کے علاوہ اس ادارے کے دیگر شیئر ہولڈرز میں عارف حبیب کارپوریشن لمیٹڈ، فاطمہ فرٹیلائزر کمپنی لمیٹڈ، لیک سٹی ہولڈنگز، اے کے ڈی گروپ اور دی سٹی اسکول گروپ شامل ہیں۔

پی آئی اے ایکویٹی لمیٹڈ پاکستان انٹرنیشنل ایئر لائنز کارپوریشن لمیٹڈ (پی آئی اے سی ایل) کے حصول اور مستقبل میں اس کے انتظامی معاملات سنبھالنے کے لیے مرکزی پلیٹ فارم کے طور پر کام کرے گی۔ کنسورشیم اس سودے کی کامیابی سے تکمیل کے لیے نجکاری کمیشن کے ساتھ مل کر کام کر رہا ہے۔

یہ پیش رفت ایک ایسے وقت میں سامنے آئی ہے جب ایک روز قبل ہی کمپٹیشن کمیشن آف پاکستان (سی سی پی) نے پی آئی اے ایکویٹی لمیٹڈ کے ذریعے قومی ایئر لائن کے حصول کی منظوری دی تھی۔ یہ منظوری کمپٹیشن ایکٹ 2010 کے تحت پہلے مرحلے کی جانچ پڑتال کے بعد دی گئی ہے۔

قومی ایئر لائن کا یہ حصول حکومتِ پاکستان کے نجکاری کے پروگرام کا حصہ ہے، جس کا مقصد پی آئی اے کی حالتِ زار کو بہتر بنانا اور اسے حکومتی مالی امداد پر انحصار سے آزاد کرنا ہے۔