مشرق وسطیٰ کی جنگ، تازہ ترین صورتحال

مشرق وسطیٰ میں جاری جنگ کے تازہ ترین حالات میں کشیدگی مزید بڑھ گئی ہے، جہاں امریکا اور ایران کے درمیان مذاکرات کی ناکامی کے بعد سخت بیانات اور فوجی اقدامات سامنے آ رہے ہیں۔

امریکی صدر ڈونلڈ ٹرمپ نے واضح کیا ہے کہ انہیں اس بات کی پروا نہیں کہ ایران دوبارہ مذاکرات کی میز پر آتا ہے یا نہیں۔ انہوں نے کہا کہ اگر ایران واپس نہ بھی آئے تو امریکا کو کوئی فرق نہیں پڑے گا۔

ادھر امریکی فوج نے اعلان کیا ہے کہ وہ پیر کو 1400 جی ایم ٹی پر ایران کی خلیجی بندرگاہوں کی ناکہ بندی شروع کرے گی، جس کے ذریعے اہم آبی گزرگاہ آبنائے ہرمز میں بحری آمدورفت پر کنٹرول حاصل کیا جائے گا۔ یہ وہ راستہ ہے جہاں سے عالمی تیل کی تقریباً 20 فیصد حصے کی ترسیل ہوتی ہے۔

ایران کی پاسدارانِ انقلاب نے ردعمل میں کہا ہے کہ آبنائے ہرمز مکمل طور پر ان کے کنٹرول میں ہے اور کسی بھی غلط قدم کی صورت میں دشمن مہلک بھنور میں پھنس جائے گا۔ ایرانی بحریہ کے سربراہ شہرام ایرانی نے امریکی دھمکی کو مضحکہ خیز قرار دیتے ہوئے کہا کہ ایرانی فوج خطے میں امریکی سرگرمیوں پر نظر رکھے ہوئے ہے۔

ایران کے پارلیمانی اسپیکر محمد باقر قالیباف نے کہا کہ ایران کسی دباؤ میں نہیں آئے گا۔ ان کے مطابق اگر جنگ مسلط کی گئی تو ایران بھرپور جواب دے گا، تاہم اگر بات چیت منطق کی بنیاد پر ہوگی تو اس کا جواب بھی اسی انداز میں دیا جائے گا۔

دوسری جانب تیل کی قیمتیں دوبارہ 100 ڈالر فی بیرل سے تجاوز کر گئی ہیں۔ ویسٹ ٹیکساس انٹرمیڈیٹ کی قیمت 104 ڈالر جبکہ برینٹ کروڈ 102 ڈالر تک پہنچ گیا ہے۔

ایرانی وزیر خارجہ عباس عراقچی نے دعویٰ کیا ہے کہ مذاکرات کے دوران معاہدہ بہت قریب تھا اور ایران نے نیک نیتی سے بات چیت کی۔

لبنان میں بھی صورتحال کشیدہ ہے، جہاں وزیر اعظم نواز سلام نے اسرائیلی افواج کے انخلا اور جنگ بندی کے لیے کوششوں کا عندیہ دیا ہے۔ اسرائیلی وزیر اعظم بنیامین نیتن یاہو نے دعویٰ کیا ہے کہ حزب اللہ کی جانب سے دراندازی کے خطرے کو ختم کر دیا گیا ہے، تاہم جھڑپیں جاری ہیں اور حالیہ حملوں میں متعدد افراد ہلاک ہو چکے ہیں۔