ایران نے آبنائے ہرمز کھولنے سے انکار کردیا

ایران اور اسرائیل نے منگل کے روز ایک بار پھر ایک دوسرے پر حملے کیے جبکہ ایران نے آبنائے ہرمز دوبارہ کھولنے اور جنگ بندی قبول کرنے سے دوٹوک انکار کر دیا ہے۔ یہ پیش رفت امریکی صدر ڈونلڈ ٹرمپ کی اس ڈیڈ لائن سے ایک روز قبل سامنے آئی ہے جس میں انہوں نے ایران سے مطالبات ماننے یا سخت کارروائی کا سامنا کرنے کی دھمکی دی تھی۔

ذرائع کے مطابق پاکستان کی ثالثی میں تیار کیے گئے فوری جنگ بندی کے امریکی منصوبے کو ایران نے مسترد کر دیا ہے۔ اس منصوبے میں آبنائے ہرمز کی ناکہ بندی کے خاتمے اور 15 سے 20 دن میں وسیع امن معاہدے پر مذاکرات شامل تھے۔ ایرانی ردعمل میں 10 نکات شامل ہیں جن میں خطے میں کشیدگی کا خاتمہ، آبنائے ہرمز سے محفوظ گزرگاہ، پابندیوں کا خاتمہ اور تعمیر نو کے اقدامات شامل ہیں۔

ادھر اسرائیلی فوج نے تہران اور دیگر علاقوں میں ایرانی حکومتی انفراسٹرکچر پر فضائی حملوں کی تصدیق کی ہے۔ سعودی عرب نے بھی مشرقی علاقے میں بیلسٹک میزائلوں کو روکے جانے کا اعلان کیا جبکہ متحدہ عرب امارات اور بحرین نے سیکیورٹی الرٹس جاری کیے ہیں۔

صدر ٹرمپ نے خبردار کیا ہے کہ اگر ایران نے ان کی شرائط نہ مانیں تو بجلی گھر اور بنیادی ڈھانچہ تباہ کر دیا جائے گا۔ ایران نے ان دھمکیوں کو بین الاقوامی قوانین کی خلاف ورزی اور جنگی جرائم کا واضح اشارہ قرار دیا ہے۔

تنازع کے باعث عالمی منڈی میں تیل کی قیمتیں 110 ڈالر فی بیرل کے قریب پہنچ گئی ہیں جبکہ آبنائے ہرمز کی بندش نے عالمی توانائی رسد کے لیے شدید خدشات پیدا کر دیے ہیں۔ جنگ کے آغاز سے اب تک ہزاروں افراد ہلاک ہو چکے ہیں۔