تمام جائز ٹیکس ریفنڈز کلیمز فوری نمٹائے جائینگے ، چیئرمین ایف بی آر

چیئرمین فیڈرل بورڈ آف ریونیو (ایف بی آر) راشد محمود لنگڑیال نے کراچی کی تاجر برادری کو یقین دہانی کرائی ہے کہ تمام جائز ٹیکس ریفنڈ کلیمز کو قانونی تقاضوں اور قواعد و ضوابط کی تکمیل کے تحت بروقت نمٹایا جائے گا جبکہ واجب الادا ٹیکسز کی وصولی متعلقہ قوانین کے مطابق یقینی بنائی جائے گی۔

چیئرمین ایف بی آر نے کراچی چیمبر کا دورہ کیا جہاں انہوں نے کاروباری برادری کو ٹیکس اور تجارتی امور میں سہولت فراہم کرنے اور درپیش حقیقی مسائل کے حل کی یقین دہانی کرائی۔

اس موقع پر کے سی سی آئی کے سینئر نمائندگان نے کراچی کی کاروباری برادری کو درپیش اہم مسائل پرتفصیلی بریفنگ دی جس پر چیئرمین ایف بی آر نے متعلقہ حکام کو فوری اقدامات کی ہدایت جاری کردی۔

چیئرمین ایف بی آر کا کہنا تھا کہ ادارہ کاروباری برادری کے جائز مسائل کے حل کے لیے پرعزم ہے اور تاجروں کے تحفظات کا بغور جائزہ لے کر انہیں ترجیحی بنیادوں پر حل کیا جائے گا۔

انہوں نے واضح کیا کہ ایف بی آر میں بدعنوانی کے خلاف زیرو ٹالرنس پالیسی پر سختی سےعمل جاری رکھا جائے گا اور بدعنوانی میں ملوث افسران کے خلاف سخت تادیبی کارروائی کی جائے گی۔

چیئرمین ایف بی آر نے افسران کو ہدایت کی کہ ٹیکس دہندگان کے لیے غیر ضروری رکاوٹیں پیدا نہ کی جائیں اور کاروباری سرگرمیوں کو آسان بنانے کے لیے سہولت کاری کو فروغ دیا جائے۔

انہوں نے کاروباری برادری سے بھی اپیل کی کہ ایف بی آر کے نظام میں بدعنوانی کے کسی بھی واقعے کی اطلاع مستند شواہد کے ساتھ فراہم کریں تاکہ مؤثر کارروائی عمل میں لائی جا سکے۔

اس موقع پر ممبر کسٹمز آپریشنز، چیف کلکٹر کسٹمز اپریزمنٹ اور چیف کمشنر ایل ٹی او بھی چیئرمین ایف بی آر کے ہمراہ موجود تھے۔

کاپی رائٹ بزنس ریکارڈر 2026