خلیجی ممالک کو برآمدات کیلئے 40 غذائی اشیاء کی منظوری

وزیراعظم شہباز شریف کو بدھ کو آگاہ کیا گیا کہ خلیجی ممالک کے ساتھ برآمدات کے فروغ کیلئے بنائی گئی خصوصی کمیٹی نے 40 فوڈ آئٹمز کی منظوری دے دی ہے۔

یہ انکشاف وزیراعظم کی زیرِ صدارت ایک اجلاس کے دوران ہوا جس میں خلیجی ممالک کو غذائی اشیاء کی فراہمی اور موجودہ علاقائی صورتحال کے تناظر میں پاکستان کی بندرگاہوں اور میری ٹائم آپریشنز سے متعلق امور کا جائزہ لیا گیا۔

اجلاس میں خلیجی ممالک کو اشیائے ضروریہ کی برآمد کے حوالے سے کیے گئے اقدامات پر بریفنگ دی گئی اور بتایا گیا کہ منظور شدہ غذائی اشیاء میں چاول، خوردنی تیل، چینی، گوشت، پولٹری، خشک دودھ، ڈیری مصنوعات، پھل اور سبزیاں شامل ہیں۔

اجلاس میں اس بات پر بھی بریفنگ دی گئی کہ سبزیوں، پھلوں اور گوشت کی برآمد پر کوئی اضافی چارجز نہیں لگائے جائیں گے جب کہ غذائی اشیاء کی برآمد کے لیے فضائی اور سمندری راستے استعمال کیے جائیں گے۔

اس موقع پر وزیراعظم نے خلیجی ممالک کو غذائی اشیاء کی فراہمی کے حوالے سے حکمتِ عملی اور پیش رفت پر اطمینان کا اظہار کیا اور متعلقہ محکموں اور حکام کی کارکردگی کو سراہا۔

انہوں نے ہدایت کی کہ تمام متعلقہ محکمے مطلوبہ غذائی اشیاء کی فراہمی اور فوڈ سیکیورٹی کے حوالے سے خلیجی ممالک کے ساتھ قریبی رابطے میں رہیں۔

وزیراعظم شہباز شریف نے ہدایت کی کہ ملک میں دستیاب اضافی غذائی اشیاء کی خلیجی ممالک کو برآمدات میں تیزی لائی جائے، تاہم اس عمل سے مقامی غذائی ضروریات متاثر نہیں ہونی چاہئیں۔ انہوں نے مزید کہا کہ ملکی ضروریات کیلئے اشیائے خورونوش کی طلب اور رسد کی مکمل مانیٹرنگ کو یقینی بنایا جائے۔

وزیراعظم نے کراچی، گوادر اور پاکستان کے دیگر بڑے بین الاقوامی ائرپورٹس پر فلائٹ آپریشنز بڑھانے کیلئے جامع منصوبہ تیار کرنے کی بھی ہدایت کی۔