امریکی ایوانِ نمائندگان نے ایران جنگ کیخلاف قرارداد مسترد کر دی، ڈونلڈ ٹرمپ کی حمایت

امریکی ایوانِ نمائندگان نے جمعرات کو ایک قرارداد مسترد کر دی جس میں صدر ڈونلڈ ٹرمپ کی جانب سے ایران کے خلاف جاری فضائی کارروائی کو روکنے اور ایران کے خلاف کسی بھی فوجی کارروائی کے لیے کانگریس کی منظوری لازمی قرار دینے کا مطالبہ کیا گیا تھا۔ ووٹنگ میں 219 ارکان نے قرارداد کی مخالفت جبکہ 212 نے حمایت کی، جس کے بعد ریپبلکن صدر کی فوجی مہم کو عملی طور پر حمایت مل گئی۔

یہ ووٹنگ زیادہ تر جماعتی بنیادوں پر ہوئی کیونکہ ایوان میں ریپبلکن پارٹی کو معمولی اکثریت حاصل ہے۔ دو ریپبلکن ارکان نے قرارداد کے حق میں جبکہ چار ڈیموکریٹس نے اس کے خلاف ووٹ دیا۔ قرارداد کے مخالفین نے ڈیموکریٹس پر الزام لگایا کہ وہ صرف ٹرمپ کی مخالفت کی وجہ سے اس معاملے کو ووٹنگ کے لیے لا رہے ہیں جس سے امریکیوں کو خطرات لاحق ہو سکتے ہیں۔

ایوان کی انٹیلی جنس کمیٹی کے ریپبلکن چیئرمین رک کرافورڈ نے بحث کے دوران کہا کہ اگر صدر کا نام ڈونلڈ ٹرمپ نہ ہوتا تو یہ معاملہ ایوان میں زیر بحث ہی نہ آتا۔

قرارداد کے حامیوں کا کہنا تھا کہ اس اقدام کا مقصد آئین کے مطابق جنگ کی منظوری دینے کا اختیار دوبارہ کانگریس کے پاس لانا ہے۔ ڈیموکریٹ رکن گریگوری میکس نے کہا کہ یہ ایسی جنگ ہے جسے حکومت نے واضح مقاصد یا حکمت عملی کے بغیر شروع کیا ہے۔

امریکہ اور اسرائیل نے گزشتہ ہفتے ایران پر حملے شروع کیے تھے جس کے نتیجے میں اب تک ایک ہزار سے زائد افراد ہلاک ہو چکے ہیں جبکہ خطے میں کشیدگی اور عدم استحکام میں اضافہ ہوا ہے۔ امریکی سینیٹ بھی ایک الگ ووٹنگ میں صدر ڈونلڈ ٹرمپ کی ایران کے خلاف فوجی کارروائی کی حمایت کر چکی ہے۔