ریاض میں امریکی سفارت خانہ پر ایران کا ڈرون حملہ

سعودی عرب کے دارالحکومت ریاض میں واقع امریکی سفارت خانے پر منگل کی صبح دو ڈرون حملے کیے گئے جس کے نتیجے میں محدود نوعیت کی آگ بھڑک اٹھی اور عمارت کو جزوی مادی نقصان پہنچا۔ سعودی وزارتِ دفاع نے سوشل میڈیا پلیٹ فارم ایکس پر جاری بیان میں ابتدائی جائزے کا حوالہ دیتے ہوئے واقعے کی تصدیق کی۔

حملہ ایسے وقت میں سامنے آیا ہے جب ایران کی جانب سے خلیجی ریاستوں پر میزائل اور ڈرون حملوں کا سلسلہ جاری ہے۔ یہ ریاستیں امریکی فوجی اڈوں کی میزبانی کرتی ہیں۔ حالیہ کشیدگی کا پس منظر ہفتہ کے روز ایران پر امریکا اور اسرائیل کی کارروائیاں بتائی جا رہی ہیں۔

عینی شاہدین کے مطابق علی الصبح زور دار دھماکے کی آواز سنی گئی اور سفارت خانے کی عمارت سے شعلے بلند ہوتے دیکھے گئے۔ ریاض کے سفارتی علاقے سے سیاہ دھواں اٹھتا رہا جہاں مختلف ممالک کے سفارتی مشنز قائم ہیں۔

ذرائع کے مطابق واقعے کے وقت عمارت خالی تھی کیونکہ یہ صبح کے ابتدائی اوقات تھے، اس لیے کسی جانی نقصان کی اطلاع نہیں ملی۔ امریکی سفارت خانے نے ریاض، جدہ اور ظہران میں مقیم امریکی شہریوں کو ہدایت کی ہے کہ وہ تاحکم ثانی سفارت خانے کا رخ نہ کریں اور محفوظ مقامات پر رہیں۔ واقعے پر سفارت خانے اور سعودی حکام کی جانب سے فوری طور پر مزید تبصرہ سامنے نہیں آیا۔