آئی ایف این ڈیلز آف دی ایئر ایوارڈز 2025 : پاکستان نے دو اعزازات اپنے نام کر لیے

پاکستان نے 1 ارب امریکی ڈالر کی تاریخی سنڈیکیٹڈ اسلامی فنانسنگ کے اعتراف میں اسلامک فنانس نیوز (آئی ایف این) ڈیلز آف دی ایئر ایوارڈز 2025 میں دو معتبر اعزازات اپنے نام کر لیے۔ پاکستان کو آئی ایف این پاکستان ڈیل آف دی ایئر 2025 اور آئی ایف این سنڈیکیٹڈ فنانس ڈیل آف دی ایئر 2025’ سے نوازا گیا ہے۔

فنانس ڈویژن کے مطابق وفاقی وزیر خزانہ و محصولات سینیٹر محمد اورنگزیب نے اس کامیابی کا خیرمقدم کرتے ہوئے کہا کہ یہ ایوارڈز پاکستان کے معاشی نظم و نسق اور عالمی مارکیٹ کے مشکل حالات میں جدید اور شریعت کے مطابق مالیاتی حل تیار کرنے کی صلاحیت پر عالمی اعتماد کی عکاسی کرتے ہیں۔

انہوں نے اسے حکومتی کوششوں کی توثیق قرار دیا جس کا مقصد فنڈنگ کے ذرائع کو متنوع بنانا اور عالمی اسلامی کیپٹل مارکیٹ میں پاکستان کے قدم جمانا ہے۔

وزیر خزانہ نے مزید کہا کہ 1 ارب ڈالر کی یہ فنانسنگ نہ صرف ایک مالیاتی سنگ میل ہے بلکہ یہ پاکستان کی بحال ہوتی ہوئی ساکھ اور میکرو اکنامک مینجمنٹ میں نظم و ضبط کا ثبوت بھی ہے۔ انہوں نے اس ٹرانزیکشن کی کامیابی میں ایشیائی ترقیاتی بینک (اے ڈی بی)، دیگر مالیاتی اداروں، قانونی مشیروں اور تمام اسٹیک ہولڈرز کے تعاون کو سراہا۔

آئی ایف این ایوارڈز اسلامی مالیاتی صنعت کے معتبر ترین اعزازات سمجھے جاتے ہیں، جو جدت اور مارکیٹ پر اثرات کی بنیاد پر دیے جاتے ہیں۔ ان اعزازات کی باقاعدہ تقریب 13 اپریل 2026 کو دبئی اور 22 اپریل 2026 کو کوالالمپور میں منعقد ہوگی، جس میں دنیا بھر سے اہم پالیسی ساز اور مالیاتی ادارے شرکت کریں گے۔