وزیراعظم کے معاون خصوصی نے پہلی میڈ ان پاکستان ایس ایم ایز ایکسپو 2026 کا اعلان کر دیا
- 24 سے 26 جنوری تک لاہور ایکسپو سینٹر میں منعقدہ ایکسپو میں کھیلوں کے سامان، سرجیکل، ٹیکسٹائل، لیدر اور دیگر شعبوں کے ہزاروں ادارے اپنی مصنوعات پیش کریں گے
وزیراعظم کے معاون خصوصی ہارون اختر خان نے اسلام آباد میں پریس کانفرنس کرتے ہوئے ملک کی پہلی میڈ ان پاکستان ایس ایم ایز ایکسپو 2026 کے آغاز کا اعلان کیا ہے۔ انہوں نے چھوٹے اور درمیانے درجے کے کاروبار (ایم ایس ایم ایز) کو قومی معیشت کی ریڑھ کی ہڈی قرار دیتے ہوئے کہا کہ پائیدار معاشی ترقی اور 6 سے 7 فیصد جی ڈی پی گروتھ کے لیے ان اداروں کو مضبوط بنانا ناگزیر ہے۔
انہوں نے اعتراف کیا کہ ماضی میں پیداواری لاگت میں اضافے اور پرانی مشینری کی وجہ سے کئی صنعتی یونٹ بند ہوئے، تاہم موجودہ حکومت ایس ایم ایز کو مرکزی دھارے میں لانے کے لیے ٹھوس اقدامات کر رہی ہے۔ یہ شعبہ ملک کے دور افتادہ علاقوں میں بے روزگاری، خاص طور پر خواتین کی بے روزگاری ختم کرنے کی بھرپور صلاحیت رکھتا ہے۔
ہارون اختر خان نے بتایا کہ حکومت بجلی کے نرخوں میں کمی، ٹیکسوں کی اصلاح اور سستے قرضوں تک رسائی کے لیے اخوت فاؤنڈیشن کے ساتھ مل کر کام کر رہی ہے۔
اس کے علاوہ آٹو، سولر پلیٹس، ویکسین، موبائل فون اور بیٹری سٹوریج جیسی نئی پالیسیاں بھی متعارف کرائی جا رہی ہیں۔ یہ سہ روزہ ایکسپو 24 سے 26 جنوری تک لاہور ایکسپو سینٹر میں منعقد ہوگی، جس میں کھیلوں کے سامان، سرجیکل، ٹیکسٹائل، لیدر اور دیگر شعبوں کے ہزاروں ادارے اپنی مصنوعات پیش کریں گے۔
انہوں نے کہا کہ نمائش میں آذربائیجان، کینیا اور ملائیشیا کے مندوبین بھی شرکت کریں گے۔ انہوں نے مزید کہا کہ شرحِ سود اور مہنگائی میں نمایاں کمی سے عالمی اداروں کا اعتماد بحال ہوا ہے۔
Comments