ای سی او وزرائے خارجہ کا اجلاس آج اسلام آباد میں ہوگا، پاکستان صدارت سنبھالے گا

پاکستان 2026-27 کے لیے اقتصادی تعاون تنظیم (ای سی او) کی صدارت سنبھالے گا، جبکہ اسلام آباد میں 15 اور 16 نومبر کو ای سی او وزرائے خارجہ کونسل کا 30واں اجلاس منعقد ہوگا، جس میں رکن ممالک کے درمیان علاقائی روابط، تجارتی انضمام اور اقتصادی تعاون کے فروغ پر توجہ دی جائے گی۔

اجلاس کی صدارت نائب وزیراعظم اور وزیر خارجہ سینیٹر محمد اسحاق ڈار کریں گے، جس میں ای سی او کے رکن ممالک کے وزرائے خارجہ اور وفود کے سربراہان کے علاوہ ای سی او سیکریٹریٹ اور اس کے ذیلی اداروں کے نمائندے بھی شرکت کریں گے۔

وزارتی اجلاس سے قبل ای سی او رکن ممالک کے اعلیٰ حکام کا اجلاس (ایس او ایم) ہوگا، جس میں تنظیم کی سرگرمیوں اور پروگراموں کا جائزہ لیا جائے گا، ذیلی اداروں کی کارکردگی کا جائزہ لینے کے ساتھ وزرائے خارجہ کونسل کے اجلاس میں پیش کرنے کے لیے ایجنڈے اور حتمی دستاویزات کے مسودوں کو تیار کیا جائے گا۔

2026-27 کے لیے ای سی او کی صدارت سنبھالنے کے بعد پاکستان تنظیم کے مقاصد کو آگے بڑھانے کے لیے مضبوط اور مستحکم ای سی او کے لیے علاقائیت کا احیا کے عنوان کے تحت کام کرے گا۔

پاکستان کی صدارت کے دوران علاقائی روابط مضبوط بنانے، علاقائی انضمام کو فروغ دینے، شراکت داری مستحکم کرنے اور مشترکہ خوشحالی، پائیدار ترقی اور زیادہ مربوط و مستحکم ای سی او خطے کے قیام کے لیے اجتماعی کوششوں کو آگے بڑھانے پر توجہ دی جائے گی۔

یہ موقع ای سی او کے کردار کو علاقائی تعاون، مذاکرات اور اقتصادی اشتراک کے مؤثر پلیٹ فارم کے طور پر مزید فعال بنانے میں بھی مددگار ثابت ہوگا۔

پاکستان کی جانب سے ای سی او کی صدارت سنبھالنے سے ملک کو علاقائی روابط کے مرکز، رسد اور ترسیل کے نظام میں سہولت کار اور علاقائی تجارت کے لیے ترجیحات طے کرنے والے ملک کے طور پر اپنی حیثیت مستحکم کرنے کا موقع ملے گا۔

ان کوششوں سے خطے کی وسیع اقتصادی صلاحیت سے فائدہ اٹھانے اور اس بات کو یقینی بنانے میں مدد ملے گی کہ علاقائی تعاون کے ثمرات ای سی او کے رکن ممالک کے عوام کی زندگیوں میں حقیقی بہتری کی صورت میں سامنے آئیں۔

دریں اثنا، شمالی قبرصی ترک جمہوریہ کے وزیر خارجہ تحسین ارتوغرلو اوغلو ای سی او وزرائے خارجہ کونسل کے 30ویں اجلاس میں شرکت کے لیے اسلام آباد پہنچ گئے۔ وزارت خارجہ کے حکام نے ہوائی اڈے پر ان کا استقبال کیا۔

کاپی رائٹ بزنس ریکارڈر، 2026