کابینہ کمیٹی کی نجکاری فہرست میں شامل ایس او ایز کے مقدمات کے مکمل جائزہ لینے کی ہدایت

کابینہ کمیٹی برائے سرکاری ملکیتی ادارے نے پیر کے روز ہدایت کی ہے کہ سرکاری اداروں کی نجکاری کے عمل کو ہموار بنانے کے لیے تمام زیر التوا قانونی مقدمات کا مکمل جائزہ لیا جائے۔ اس مقصد کے لیے وزارت خزانہ اور نجکاری ڈویژن کو متعلقہ وزارتوں اور لا ڈویژن کے ساتھ مل کر ان تنازعات کے حل کے طریقہ کار وضع کرنے کی ہدایت دی گئی ہے تاکہ نجکاری کے لیے منتخب اداروں کو ہر لحاظ سے تیار کیا جا سکے۔

یہ ہدایات وفاقی وزیر برائے خزانہ و محصولات محمد اورنگزیب کی زیر صدارت منعقد ہونے والے کابینہ کمیٹی کے اجلاس میں جاری کی گئیں، جس میں سرکاری اداروں کے بورڈز میں اہم تقرریوں اور تنظیم نو کی بھی منظوری دی گئی۔ اجلاس میں وزارت خزانہ، وزارت بحری امور، پٹرولیم ڈویژن اور وزارت صنعت و پیداوار کی جانب سے پیش کردہ نکات پر غور کیا گیا اور ایجنڈے کی منظوری دی گئی۔

اجلاس میں زرعی ترقیاتی بینک لمیٹڈ کے بورڈ میں ایک آزاد ڈائریکٹر کی تقرری، پورٹ قاسم اتھارٹی کراچی کے بورڈ کے لیے آزاد ڈائریکٹرز کی منظوری اور سوئی ناردرن گیس پائپ لائنز لمیٹڈ کے بورڈ میں خالی نشست کو پُر کرنے کے لیے نامزدگی کی منظوری شامل تھی۔

اسی طرح وزارت صنعت و پیداوار کی جانب سے سندھ انجینئرنگ لمیٹڈ کے بورڈ آف ڈائریکٹرز کی تشکیل، اسمال اینڈ میڈیم انٹرپرائزز ڈویلپمنٹ اتھارٹی کے بورڈ میں پنجاب سے نجی شعبے کے رکن کی تقرری اور اسٹیٹ انجینئرنگ کارپوریشن کے بورڈ کی دوبارہ تشکیل کی بھی منظوری دی گئی۔

چیئرمین اجلاس نے نجی شعبے سے آزاد ڈائریکٹرز کے انتخاب میں اختیار کی گئی محتاط حکمت عملی کو سراہا اور کہا کہ ایسے افراد کی تقرری ضروری ہے جو تجربہ، مہارت اور پیشہ ورانہ بصیرت رکھتے ہوں تاکہ سرکاری اداروں کے نظم و نسق کو بہتر بنایا جا سکے۔

اجلاس میں یہ بھی فیصلہ کیا گیا کہ نجکاری کے لیے منتخب تمام سرکاری اداروں کے جاری مقدمات کی جامع جانچ، تجزیہ اور ریکارڈ کی چھان بین کی جائے گی، اور قانونی پیچیدگیوں کو دور کر کے ان اداروں کو نجکاری کے لیے مکمل طور پر تیار کیا جائے گا۔

اجلاس میں وفاقی وزیر منصوبہ بندی احسن اقبال، وفاقی وزیر سائنس و ٹیکنالوجی خالد حسین مگسی سمیت متعلقہ وزارتوں اور اداروں کے اعلیٰ حکام نے شرکت کی۔

کاپی رائٹ بزنس ریکارڈر، 2025