پشاور، وفاقی کانسٹیبلری ہیڈکوارٹر پر حملہ ناکام، 3 دہشت گرد ہلاک

پشاور میں پیر کو تین خودکش بمباروں نے ایک پاکستانی پیرا ملٹری فورس کے ہیڈکوارٹرز کو نشانہ بنایا، جس کے نتیجے میں تین اہلکار شہید اور کم از کم پانچ زخمی ہو گئے۔

پولیس کے مطابق حملہ آوروں نے ہیڈکوارٹرز میں داخل ہونے کے دوران فائرنگ کی اور بعد میں کمپلیکس کے اندر خود کو دھماکے سے اڑا دیا۔ فورس کے ڈپٹی کمانڈنٹ جاوید اقبال کے مطابق تین نیم فوجی اہلکار شہید ہوئے۔

ایک سینئر اہلکار نے نام ظاہر نہ کرنے کی شرط پر رائٹرز کو بتایا کہ پہلا خودکش بمبار کانسٹیبلری کے مرکزی دروازے پر حملہ آور ہوا جبکہ دیگر کمپاؤنڈ میں داخل ہوئے۔

اہلکار نے مزید کہا کہ فوج اور پولیس سمیت قانون نافذ کرنے والے اداروں نے علاقے کو گھیر لیا ہے اور محتاط انداز میں صورتحال پر قابو پا رہے ہیں کیونکہ ہمیں شبہ ہے کہ ہیڈکوارٹرز کے اندر کچھ دہشت گرد موجود ہیں۔

یہ ہیڈکوارٹرز پشاور کے گنجان آباد علاقے میں واقع ہے، جو خیبر پختونخوا کا دارالحکومت ہے۔

مقامی رہائشی صفدر خان نے رائٹرز کو بتایا کہ سڑک ٹریفک کے لیے بند کر دی گئی ہے اور فوج، پولیس اور سیکیورٹی اہلکاروں نے علاقے کو گھیر لیا ہے۔

لیڈی ریڈنگ اسپتال کے ترجمان محمد عاصم کے مطابق زخمیوں میں دو نیم فوجی اہلکار شامل ہیں اور تمام زخمیوں کو اسپتال منتقل کر دیا گیا۔

اب تک کسی بھی عسکریت پسند گروپ نے حملے کی ذمہ داری قبول نہیں کی۔

ادھر، صدر آصف علی زرداری نے حملے کی شدید مذمت کرتے ہوئے تعزیت کا اظہار کیا ہے۔

انہوں نے کہا کہ بیرونی پشت پناہی یافتہ فتنے الخوارج پاکستان کے اتحاد، عزم اور حوصلے کو کمزور نہیں کر سکتے۔

وزیر اعظم محمد شہباز شریف نے بھی حملے کی مذمت کی اور زخمیوں کو فوری طبی امداد فراہم کرنے کی ہدایت کی۔

وزیر اعظم نے کہا کہ واقعے کے ذمہ داروں کی جلد شناخت کی جائے اور انہیں قانون کے مطابق سزا دی جائے۔

وفاقی وزیرِ داخلہ محسن نقوی نے اپنے بیان میں خوارج حملے کو ناکام بنانے والے اہلکاروں کو خراجِ تحسین پیش کیا۔

انہوں نے کہا کہ ہمارے شہید اہلکار ہمارے ہیرو ہیں۔ ان کی عظیم قربانی ہمیشہ یاد رکھی جائے گی۔

پاکستان میں دہشت گردی کی سرگرمیوں میں اضافہ دیکھنے میں آیا ہے، جس کی ابتدا نومبر 2022 میں ٹی ٹی پی کی حکومت کے ساتھ جنگ بندی ختم کرنے اور سیکیورٹی فورسز، پولیس اور قانون نافذ کرنے والے اداروں کے اہلکاروں پر حملے کی دھمکی دینے کے بعد ہوئی۔