ریونیو بڑھانے کیلئے اے ڈی سی جی افسران کو اضافی اختیارات دینے کا حکم

وزیر اعلیٰ پنجاب مریم نواز شریف کی زیر صدارت ریونیو کلیکشن سے متعلق خصوصی اجلاس منعقد ہوا، جس میں ڈائریکٹر جنرل پنجاب ریونیو اتھارٹی (پی آر اے) معظم علی سپرا نے ٹیکس اہداف اور ممکنہ نئے شعبہ جات پر تفصیلی بریفنگ دی۔

انہوں نے کہا کہ وزیر اعلیٰ مریم نواز شریف کی ہدایت پر پنجاب ریونیو اتھارٹی میں ایک خصوصی یونٹ قائم کیا جا رہا ہے ،تاکہ آمدن میں اضافہ کیا جا سکے۔

انہوں نے مزید بتایا کہ اس خصوصی یونٹ میں فیکٹورئیل ماہر، ٹیکس کنسلٹنٹ، قانونی ماہر اور ڈیٹا اینالسٹ شامل ہوں گے۔

انہوں نے واضح کیا کہ پی آر اے نے اپنے دائرہ اختیار کو 30 اضلاع تک بڑھانے کا فیصلہ کیا ہے اور اس مقصد کے لیے وزیر اعلیٰ کی اصولی منظوری کے بعد 130 انفورسمنٹ افسران کی بھرتی کی جائے گی۔

وزیر اعلیٰ مریم نواز شریف نے متعلقہ حکام کو ہدایت کی کہ اضلاع میں ایڈیشنل ڈپٹی کمشنرز جنرل (اے ڈی سی جی) کو ریونیو اتھارٹی سے متعلق اضافی ذمہ داریاں سونپی جائیں۔ انہوں نے پنجاب میں آمدنی بڑھانے کے لیے 19 نئے شعبہ جات کو شامل کرنے کا جائزہ بھی لیا۔

حکام نے بریفنگ میں بتایا کہ پی آر اے نے ممکنہ ٹیکس دہندگان کی سہولت کے لیے ایک ایپ متعارف کرائی ہے، جس پر وزیر اعلیٰ نے زور دیا کہ ایماندار ٹیکس دہندگان کو پریشان نہ کیا جائے اور ٹیکس وصولی کے عمل میں شفافیت کو یقینی بنایا جائے۔

کاپی رائٹ بزنس ریکارڈر 2025