ماری انرجیز نے ہائی کاربیکس سے پشاور بلاک میں اکثریتی حصہ حاصل کرلئے

ماری انرجیز لمیٹڈ (ماری) نے خیبر پختونخوا میں واقع پشاور بلاک میں 65 فیصد ورکنگ انٹرسٹ اور آپریٹرشپ حاصل کرنے کے لیے ہائی کاربیکس امریکن انرجی انکارپوریشن کے ساتھ ایک فارم آؤٹ معاہدے پر دستخط کیے ہیں۔

لسٹڈ کمپنی نے منگل کو پاکستان اسٹاک ایکسچینج (پی ایس ایکس) کو بھیجے گئے نوٹس میں اس پیش رفت کا اعلان کیا۔

نوٹس کے مطابق ماری انرجیز اور ہائی کاربیکس امریکن انرجی انکارپوریشن نے ایک فارم آؤٹ معاہدے پر دستخط کیے ہیں جس کے تحت ماری انرجیز پشاور بلاک میں ہائی کاربیکس سے 65 فیصد ورکنگ انٹرسٹ اور آپریٹرشپ حاصل کرے گی۔

ماری نے کہا کہ یہ حصول ضروری ریگولیٹری منظوریوں، حکومت کے ساتھ ڈیڈز آف اسائنمنٹ پر عمل درآمد، اور دیگر متعلقہ رسمی کارروائیوں کی تکمیل سے مشروط ہے۔

کمپنی نے مزید کہا کہ یہ معاہدہ ماری انرجیز کے عزم کی عکاسی کرتا ہے کہ وہ اپنے اپ اسٹریم پورٹ فولیو کو مضبوط بنانے کے لیے ملک بھر میں ممکنہ آن شور علاقوں میں توسیع کرے، مقامی ہائیڈروکاربن تلاش اور ترقی کی سرگرمیوں کی حمایت کرے اور پاکستان کی توانائی کی سلامتی میں حصہ ڈالے۔

ماری انرجیز ملک کی دوسری بڑی قدرتی گیس پیدا کرنے والی کمپنی ہے اور ایک مربوط آئل اینڈ گیس ای اینڈ پی کمپنی ہے جس کی ایکسپلوریشن کامیابی کی شرح تقریباً 70 فیصد ہے جو کہ ملکی سطح پر تقریباً 30 فیصد اور بین الاقوامی سطح پر تقریباً 14 فیصد کے صنعتی اوسط سے کافی زیادہ ہے۔

کمپنی سندھ کے دھڑکی میں ماری گیس فیلڈ میں پاکستان کے سب سے بڑے گیس ذخیرے کو چلا رہی ہے۔