چین کے وزیراعظم اور یورپی یونین کی سربراہ کی ملاقات، تجارتی تعاون پر زور

نیویارک میں اقوام متحدہ کی جنرل اسمبلی کے موقع پر چین کے وزیراعظم لی چیانگ اور یورپی یونین کی سربراہ ارسولا فان ڈیر لاین نے ملاقات میں تجارتی تعاون پر زور دیا۔ دنیا کی دوسری اور تیسری بڑی معیشتوں نے امریکی صدر ڈونلڈ ٹرمپ کی ٹیرف پالیسی کے دباؤ کے تناظر میں کشیدگی کم کرنے کی ضرورت پر اتفاق کیا۔

یورپی سربراہ نے ملاقات کے بعد ایک بیان میں کہا کہ انہوں نے چین کے ساتھ تجارتی امور پر بات کی اور باہمی سمجھ بوجھ کے جذبے کے تحت چین کی شمولیت کو سراہا۔ انہوں نے واضح کیا کہ یورپ کی تشویشات جیسے برآمدی کنٹرولز، مارکیٹ تک رسائی اور اوورکیپیسٹی پہلے سے ہی جانی پہچانی ہیں۔

چین اور یورپی یونین گزشتہ دو برسوں سے تجارتی جنگ کے دہانے پر ہیں، جس کا آغاز 2023 میں یورپی کمیشن کی جانب سے چینی الیکٹرک گاڑیوں پر سبسڈی مخالف تحقیقات سے ہوا، جس کے جواب میں بیجنگ نے یورپی مصنوعات پر اقدامات کیے۔

چینی وزارتِ خارجہ کے مطابق لی چیانگ نے امید ظاہر کی کہ یورپی یونین کھلے تجارتی و سرمایہ کاری بازاروں کے اپنے عہد پر قائم رہے گی۔ ان کا کہنا تھا کہ دنیا کے دو اہم ستون ہونے کے ناطے چین اور یورپی یونین کو ذمہ داری اور اسٹریٹجک خودمختاری کا مظاہرہ کرنا چاہیے۔

دوسری جانب فان ڈیر لاین نے چین سے مطالبہ کیا کہ وہ روس پر اثر انداز ہو کر یوکرین جنگ کے خاتمے کے لیے کردار ادا کرے۔ تاہم چینی بیان میں اس تنازع کا کوئی ذکر نہیں کیا گیا۔

فان ڈیر لاین نے کہا کہ وقت سفارت کاری کا ہے، یہ دنیا کو ایک مضبوط پیغام دے گا۔