پیٹرول کی قیمت میں 1.19 روپے اضافہ، ڈیزل میں 1.91 روپے فی لیٹر کمی

حکومت نے 7 اکتوبر 2026 کے لیے پیٹرول کی قیمت میں 1.19 روپے فی لیٹر اضافہ کرکے 394.83 روپے اور ہائی اسپیڈ ڈیزل (ایچ ایس ڈی) کی قیمت میں 1.91 روپے فی لیٹر کمی کرکے 395.85 روپے فی لیٹر کردی ہے۔

پیٹرولیم ڈویژن کی جانب سے جاری نوٹیفکیشن کے مطابق آئل اینڈ گیس ریگولیٹری اتھارٹی (اوگرا) نے حکومت کے پٹرولیم مصنوعات کی قیمتوں کے تعین کے طریقہ کار کے تحت پٹرولیم مصنوعات کی ڈپو سے سابق قیمتوں میں نظرثانی کی۔

نوٹیفکیشن میں کہا گیا کہ نظرثانی شدہ قیمتوں کا تعلق عالمی منڈی میں پیٹرول اور ڈیزل کی قیمتوں میں ہونے والی تبدیلیوں سے ہے۔

نوٹیفکیشن میں مزید کہا گیا کہ عالمی منڈی کی قیمتوں، پلاٹس نرخوں، پریمیم اور دیگر قابلِ اطلاق اخراجات میں تبدیلیوں کے مطابق پٹرولیم مصنوعات کی قیمتوں میں ردوبدل کیا گیا ہے۔

نظرثانی شدہ قیمتیں 7 اکتوبر 2026 سے نافذ العمل ہوں گی۔

پیر کو وفاقی حکومت نے ڈیزل کی قیمت میں 1.88 روپے فی لیٹر کمی کرکے 397.76 روپے، جبکہ پیٹرول کی قیمت میں 88 پیسے فی لیٹر اضافہ کرکے 393.64 روپے کردی تھی۔

دریں اثنا، مشرقِ وسطیٰ سے خام تیل کی برآمدات میں اضافے اور گروپ آف سیون ممالک کی جانب سے ہنگامی ڈیزل اور خام تیل کے ذخائر جاری کرنے پر اتفاق کے باعث سپلائی کے خدشات میں کمی سے منگل کو تیل کی قیمتوں میں تقریباً 2 فیصد گراوٹ ریکارڈ کی گئی۔

برینٹ فیوچرز 1.84 ڈالر یا 1.8 فیصد کمی کے بعد صبح 10:30 بجے مشرقی امریکی وقت (1430 جی ایم ٹی) پر 98.48 ڈالر فی بیرل پر آگئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 1.42 ڈالر یا 1.6 فیصد کمی سے 88.01 ڈالر فی بیرل ہوگئی۔

قیمتوں میں اس کمی کے باعث برینٹ کے 8 ستمبر کے بعد کم ترین سطح پر بند ہونے کا امکان ہے، جبکہ ڈبلیو ٹی آئی کے لیے 31 اگست کے بعد کم ترین اختتامی قیمت متوقع ہے۔