ٹرمپ کی چین کے صدر شی جن پنگ کو ہتھیار فروخت کرنے کی پیشکش کی تردید

امریکی صدر ڈونلڈ ٹرمپ نے پیر کو اس بات کی تردید کی کہ انہوں نے چینی صدر شی جن پنگ سے امریکی ہتھیار خریدنے کے بارے میں پوچھا تھا۔ یہ بیان ان کے اپنے سفیر کے اس دعوے کے برعکس ہے جس میں کہا گیا تھا کہ ٹرمپ نے چینی صدر کو ہتھیار فروخت کرنے کی پیشکش کی تھی۔

امریکی سفیر برائے چین ڈیوڈ پرڈیو نے اتوار کو فاکس نیوز کو بتایا تھا کہ ٹرمپ نے گزشتہ ہفتے شی جن پنگ کے وائٹ ہاؤس کے دورے کے دوران یہ پیشکش کی تھی۔ تاہم اوول آفس میں صحافیوں کے سوال پر ٹرمپ نے کہا کہ انہوں نے ایسی کوئی بات نہیں سنی اور انہیں سفیر سے اس بارے میں پوچھنا ہوگا۔

ٹرمپ نے کہا کہ ممکن ہے چین امریکی ہتھیار خریدنے میں دلچسپی رکھتا ہو کیونکہ امریکا بہتر فوجی سازوسامان تیار کرتا ہے، تاہم دونوں رہنماؤں کے درمیان اس معاملے پر بات نہیں ہوئی۔

امریکی محکمہ خارجہ نے نیویارک ٹائمز کو بتایا کہ امریکی قانون چین کو ہتھیاروں کی فروخت کی اجازت نہیں دیتا اور چین کو ہتھیار فروخت کرنے کی نہ کوئی پیشکش ہے اور نہ منصوبہ۔

چین کی وزارت خارجہ نے براہ راست تبصرہ کرنے سے گریز کیا، تاہم کہا کہ چین اپنی ضروریات کے مطابق دفاعی صلاحیتوں کو مضبوط کرتا رہے گا۔

امریکا اور چین کے درمیان تائیوان کو امریکی ہتھیاروں کی فروخت طویل عرصے سے تنازع کا باعث ہے۔ واشنگٹن نے دسمبر میں تائیوان کے لیے 11.1 ارب ڈالر کی اسلحہ فروخت کی منظوری دی تھی، جبکہ مئی میں 14 ارب ڈالر کی خریداری روک دی گئی تھی۔