برآمدات پر مبنی معاشی ترقی؟

وزیراعظم شہباز شریف نے منگل کو ممتاز صنعت کاروں اور کاروباری شخصیات کے ساتھ ایک اجلاس کے دوران برآمد کنندگان کے لیے سپر ٹیکس سے استثنیٰ میں توسیع کے معاملے کا جائزہ لینے کی ہدایت جاری کی اور کاروباری برادری کو درپیش زیر التوا مسائل کے حل کے لیے فوری اقدامات پر زور دیا۔

اسی روز فیڈرل بورڈ آف ریونیو (ایف بی آر) کی جانب سے جاری کردہ انکم ٹیکس وضاحتی سرکلر نمبر 2 کے مطابق 50 کروڑ روپے آمدن کمانے والوں سمیت تمام افراد کے لیے سپر ٹیکس ختم کردیا گیا، تاہم ان افراد کو اس سے مستثنیٰ رکھا گیا ہے جنہیں ایک فہرست میں مخصوص کیا گیا ہے۔ 50 کروڑ روپے سے کم آمدن رکھنے والے ان افراد کے لیے سپر ٹیکس کی شرح 10 فیصد سے کم کرکے 8 فیصد کردی گئی ہے، جبکہ سیکنڈ شیڈول میں ایک نئی شق بھی متعارف کرائی گئی ہے، جس کے تحت برآمدی آمدنی پر سپر ٹیکس مکمل طور پر عائد نہیں ہوگا، بشرطیکہ وہ سال کے دوران برآمد کنندگان کے مجموعی کاروباری حجم کے 80 فیصد سے زیادہ ہو۔

ایف بی آر کی جانب سے وزیراعظم کی ہدایات پر جس رفتار سے عمل درآمد کیا گیا وہ قابل ذکر ہے، جو ملک کی برآمدی آمدنی کو زیادہ سے زیادہ کرنے کی کوشش کی عکاسی کرتا ہے۔ برآمدی آمدنی متعدد وجوہات کے باعث متاثر ہوئی ہے، جن میں علاقائی حریف ممالک، خصوصاً بھارت اور چین کے مقابلے میں یوٹیلیٹی یعنی پیداواری لاگت زیادہ ہونا، اور مشرق وسطیٰ میں جاری تنازع شامل ہیں۔ اس تنازع کے باعث خلیجی ممالک کو برآمدات کم ہوئی ہیں جبکہ نقل و حمل کی لاگت بھی زیادہ ہوگئی ہے، کیونکہ برآمدی سامان کو سستی سمندری ترسیل کے بجائے ہوائی راستے سے منتقل کیا جارہا ہے۔

اس کے علاوہ سابقہ مالی اور زری مراعات واپس لی جارہی ہیں، کیونکہ جاری بین الاقوامی مالیاتی فنڈ (آئی ایم ایف) پروگرام کے تحت طے شدہ شرائط کی وجہ سے ان مراعات کا مرحلہ وار خاتمہ کیا جارہا ہے۔ یہ معاہدہ آئی ایم ایف کی اکتوبر 2024 کی قرض سے متعلق دستاویزات میں دیے گئے اس مشاہدے کی بنیاد پر تھا کہ ریاست کی جانب سے سبسڈیز، سازگار ٹیکس انتظامات، تحفظ اور حکومتی قیمتوں کے تعین کے ذریعے کاروباروں کی حمایت نے ایک متحرک اور بیرونی منڈیوں پر مرکوز معیشت کی ترقی کو نقصان پہنچایا ہے۔ ٹیکس نظام کو مراعات یافتہ شعبوں، جیسے رئیل اسٹیٹ، زراعت، مینوفیکچرنگ اور توانائی کے لیے غیر شفاف معاونت فراہم کرنے کے لیے وسیع پیمانے پر استعمال کیا گیا ہے، جبکہ خصوصی اقتصادی زونز میں بھی مسلسل اضافہ ہوا ہے۔ زرعی اجناس، ایندھن کی مصنوعات، بجلی اور گیس، جن کی قیمتوں کا سال میں دو مرتبہ تعین کیا جاتا ہے، سمیت قیمتوں کے تعین میں حکومت کی مداخلت، بلند ٹیرف اور نان ٹیرف تحفظ کے ساتھ مل کر، مخصوص گروہوں یا شعبوں کے حق میں میدان کو ہموار کرنے کے بجائے ان کے حق میں جھکا دیتی رہی ہے۔ اس تمام حمایت کے باوجود کاروباری شعبہ ترقی کا محرک بننے میں ناکام رہا ہے، جبکہ مراعات نے بالآخر مسابقت کو کمزور کیا اور وسائل کو مستقل طور پر غیر مؤثر صنعتوں، جن میں ہمیشہ نوزائیدہ رہنے والی صنعتیں بھی شامل ہیں، میں پھنسا دیا۔

دو نکات انتہائی اہم ہیں۔ اول، مراعات یافتہ شعبوں کا حوالہ زرعی آمدنی ٹیکس کی کم وصولیوں سے سب سے بہتر طور پر ظاہر ہوتا ہے۔ یہ ٹیکس آئی ایم ایف کے اصرار پر نافذ کیا گیا تھا، تاہم اس سے حاصل ہونے والی آمدنی اس کی ممکنہ سطح یا توقعات سے کہیں کم ہے، جو امیر کسانوں کے سیاسی اثر و رسوخ کی نشاندہی کرتی ہے۔

دوم، اور یہ بات آئی ایم ایف کے تجزیے میں شامل نہیں ہے، پاکستان بڑی حد تک اپنی اضافی پیداوار برآمد کرتا ہے، بجائے اس کے کہ خصوصی طور پر برآمدات کے لیے صنعتیں قائم کرے۔ اس کے برعکس جاپان اور جرمنی نے جنگ کے بعد اس حکمت عملی کو انتہائی کامیابی سے نافذ کیا تھا۔

بہرحال ایسے شواہد موجود ہیں جن سے ظاہر ہوتا ہے کہ برآمدات کی قیادت میں معاشی ترقی کا تصور شاید اب کچھ پرانا ہوچکا ہے، کیونکہ ترسیلات زر کی آمد اب برآمدات سے زیادہ ہو رہی ہے۔ ترسیلات زر میں ابتدائی اضافے کی وجہ سرکاری ذرائع کے استعمال کے لیے دی جانے والی مراعات کو قرار دیا گیا تھا، بجائے اس کے کہ رقوم غیر قانونی ہنڈی یا حوالہ نظام کے ذریعے بھیجی جاتیں۔ تاہم یہ مراعات حال ہی میں واپس لے لی گئی ہیں۔ حکومت کو چاہیے کہ وہ ان رقوم کی آمد پر محتاط نظر رکھے تاکہ یہ سلسلہ مسلسل بڑھتا رہے۔

آخر میں ابھی یہ واضح نہیں ہے کہ سپر ٹیکس سے حاصل ہونے والی آمدنی میں کمی آئی ایم ایف کے لیے اس تشویش کا باعث بنے گی یا نہیں کہ اس کی شرائط کی خلاف ورزی ہوئی ہے، خاص طور پر رواں ماہ کے آخر میں ہونے والے متوقع چوتھے جائزے کے دوران، یا پھر اس اقدام کی منظوری پہلے ہی حاصل کرلی گئی تھی۔

اگر ایسا ہوتا ہے تو اس اقدام کو واپس لینا ہوگا، کیونکہ آئی ایم ایف نے قسطوں کی فراہمی معطل کرنے پر آمادگی کا اظہار کیا ہے، جس کے نتیجے میں زرمبادلہ کے ذخائر پر سنگین اثرات مرتب ہوسکتے ہیں۔

کاپی رائٹ بزنس ریکارڈر، 2026