فیلڈ مارشل عاصم منیر کا آرڈیننس فیکٹری کا دورہ، پیداواری صلاحیتوں کا جائزہ لیا

آرمی چیف و چیف آف ڈیفنس فورسز فیلڈ مارشل سید عاصم منیر نے ہفتہ کو واہ میں پاکستان کے سب سے بڑے دفاعی صنعتی کمپلیکس پاکستان آرڈیننس فیکٹریز (پی او ایف) کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے دورے کے دوران پی او ایف کی پیداواری صلاحیت، برآمدی استعداد اور ملکی دفاعی صنعتی بنیاد میں کردار کا جائزہ لیا۔

اس موقع پر آرمی چیف کو ادارے کے مختلف شعبوں، آپریشنز اور مقامی سطح پر جدید عسکری سازوسامان کی تیاری پر بریفنگ دی گئی۔

ترجمان پاک فوج کے مطابق فیلڈ مارشل سید عاصم منیر نے مقامی طور پر ڈیزائن اور تیار کیے گئے اسلحے اور گولہ بارود کے ٹیسٹ اور ٹرائلز کا بھی مشاہدہ کیا۔

آئی ایس پی آر کے مطابق پی او ایف دفاعی پیداوار میں جدت، خود انحصاری اور ملکی صلاحیتوں میں اضافے کے لیے پرعزم ہے۔

فیلڈ مارشل کو ڈی آئی پی آر اے آرڈیننس کے نفاذ کے بعد پی او ایف کی کارپوریٹائزیشن کے بارے میں پیش رفت پر بھی بریفنگ دی گئی۔

پی او ایف میں مقامی پیداوار اور استعداد کار بڑھانے کے لیے دو نئے صنعتی پلانٹس کی تنصیب جاری ہے جن سے رواں سال کے اختتام تک پیداوار متوقع ہے۔

فیلڈ مارشل کا یہ دورہ دفاعی شعبے میں خود انحصاری، مقامی پیداوار اور تکنیکی جدت کے فروغ کے عزم کا عکاس ہے۔