ٹرمپ انتظامیہ کا دنیا بھر میں ویزا اپائنٹمنٹس عارضی طور پر روکنے کا فیصلہ

امریکی صدر ڈونلڈ ٹرمپ کی انتظامیہ نے دنیا بھر میں ویزا درخواست گزاروں کے لیے اپائنٹمنٹس کا عمل عارضی طور پر روک دیا ہے، یہ اقدام حکومت کی جانب سے جاری سخت امیگریشن کریک ڈاؤن کے دوران سامنے آیا ہے۔

امریکی محکمہ خارجہ کے ترجمان نے منگل کو بتایا کہ دنیا بھر میں تمام امریکی سفارتخانوں اور قونصل خانوں میں ایک عالمی تربیتی پروگرام شروع کیا گیا ہے، جس کے باعث ویزا سروسز کی اپائنٹمنٹس میں ردوبدل کیا جائے گا۔

محکمہ خارجہ کے مطابق تربیت کا مقصد قونصلر افسران کو ایسے درخواست گزاروں کی بہتر جانچ کے لیے تیار کرنا ہے جن کے بارے میں خدشہ ہو کہ وہ امریکی عوامی فلاحی سہولیات پر انحصار کرسکتے ہیں۔ اس کے علاوہ ویزا درخواستوں کی جامع اور یکساں بنیادوں پر جانچ کو بھی یقینی بنایا جائے گا۔

فنانشل ٹائمز نے پہلے رپورٹ کیا تھا کہ امریکی سفارتخانوں اور قونصل خانوں میں طے شدہ انٹرویوز رکھنے والے تارکین وطن ویزا درخواست گزاروں کو ای میلز کے ذریعے آگاہ کیا گیا ہے کہ ان کی اپائنٹمنٹس دوبارہ مقرر کی جا رہی ہیں اور نئی تاریخ سے متعلق بعد میں اطلاع دی جائے گی۔

ٹرمپ انتظامیہ نے اپنے دوسرے دورِ صدارت میں غیر قانونی تارکین وطن کی ملک بدری اور امیگریشن قوانین کے نفاذ میں سختی کی ہے۔ مختلف وجوہات کی بنیاد پر ویزے اور گرین کارڈ منسوخ کرنے کے علاوہ درخواستیں مسترد بھی کی جا رہی ہیں، جن میں سیاسی خیالات اور غزہ میں اسرائیلی کارروائیوں کے خلاف فلسطین حامی احتجاج بھی شامل ہیں۔

حکومت کا مؤقف ہے کہ یہ اقدامات داخلی سلامتی بہتر بنانے کے لیے کیے جا رہے ہیں، تاہم انسانی حقوق کی تنظیموں نے انہیں امتیازی قرار دیتے ہوئے آزادی اظہار اور قانونی حقوق کی خلاف ورزی پر تشویش کا اظہار کیا ہے۔

اس کریک ڈاؤن کو عدالتی رکاوٹوں کا بھی سامنا ہے۔ ایک امریکی جج نے حال ہی میں 75 ممالک کے شہریوں کے امیگرنٹ ویزے معطل کرنے کی پالیسی کو منسوخ کرتے ہوئے قرار دیا کہ وزیر خارجہ مارکو روبیو نے اپنے قانونی اختیارات سے تجاوز کیا۔