امریکا میں شرح سود سے متعلق توقعات، سونا دو ماہ کی بلند ترین سطح پر پہنچ گیا

عالمی منڈی میں سونے کی قیمت مسلسل تیسرے روز بھی بڑھ گئی اور منگل کو دو ماہ سے زائد کی بلند ترین سطح پر پہنچ گئی، جبکہ سرمایہ کاروں کی نظریں امریکا میں مہنگائی کے آئندہ اعداد و شمار پر مرکوز ہیں، جن سے فیڈرل ریزرو کی آئندہ شرح سود پالیسی کا اندازہ لگایا جائے گا۔

اسپاٹ گولڈ کی قیمت ایک فیصد اضافے کے بعد 4,432.74 ڈالر فی اونس تک پہنچ گئی، جو 5 جون کے بعد بلند ترین سطح ہے۔ امریکی گولڈ فیوچرز 1.7 فیصد اضافے کے ساتھ 4,492.60 ڈالر فی اونس پر ٹریڈ ہوتے رہے۔

آئی جی کے مارکیٹ تجزیہ کار ٹونی سیکامور کے مطابق حالیہ تیزی کی وجہ ان سرمایہ کاروں میں موقع ضائع ہونے کا خدشہ ہے جو 4,000 ڈالر کی سطح پر خریداری نہ کر سکے، جبکہ مختصر پوزیشنز بند کیے جانے اور محفوظ سرمایہ کاری (سیف ہیون) کی طلب میں اضافے نے بھی قیمتوں کو سہارا دیا ہے۔ ان کے مطابق درمیانی مدت میں سونا 5,000 ڈالر فی اونس کی سطح کی جانب بڑھ سکتا ہے۔

بدھ کو امریکا میں صارفین کی مہنگائی (سی پی آئی) اور جمعرات کو پیداواری مہنگائی (پی پی آئی) کے اعداد و شمار جاری ہوں گے، جو فیڈرل ریزرو کی آئندہ مانیٹری پالیسی کے حوالے سے اہم سمجھے جا رہے ہیں۔ گزشتہ ہفتے جولائی کے کمزور روزگار کے اعداد و شمار کے بعد مارکیٹ نے شرح سود میں اضافے کی توقعات کم کر دی ہیں۔

فیڈرل ریزرو نے جولائی کے اجلاس میں شرح سود برقرار رکھی تھی، تاہم تین ارکان نے اضافے کے حق میں اختلافی رائے دی تھی۔ کم شرح سود کا ماحول عام طور پر سونے کے لیے مثبت سمجھا جاتا ہے کیونکہ اس پر سود ادا نہیں ہوتا۔

دوسری جانب امریکا اور ایران کے درمیان امن معاہدے سے متعلق بڑھتی کشیدگی اور آبنائے ہرمز کی صورتحال نے بھی محفوظ سرمایہ کاری کی طلب کو تقویت دی۔

دیگر قیمتی دھاتوں میں چاندی 0.9 فیصد اضافے کے ساتھ 66.30 ڈالر، پلاٹینم 0.7 فیصد بڑھ کر 1,765.26 ڈالر اور پیلاڈیم 0.8 فیصد اضافے کے بعد 1,394 ڈالر فی اونس پر پہنچ گیا۔