سرمایہ کار محتاط، سونا سات ہفتوں کی بلند ترین سطح سے نیچے آگیا

عالمی منڈی میں پیر کے روز سونے کی قیمتوں میں کمی دیکھی گئی، کیونکہ سرمایہ کار گزشتہ ہفتے سات ہفتوں کی بلند ترین سطح پر پہنچنے کے بعد منافع کے حصول میں مصروف رہے۔ دوسری جانب مارکیٹ کی توجہ اس ہفتے جاری ہونے والے امریکی مہنگائی کے اعدادوشمار پر مرکوز ہے، جو فیڈرل ریزرو کی آئندہ شرح سود پالیسی کے بارے میں اہم اشارے فراہم کر سکتے ہیں۔

اسپاٹ گولڈ 0.5 فیصد کمی کے ساتھ 4,322.28 ڈالر فی اونس پر آ گیا، جبکہ امریکی گولڈ فیوچر 0.4 فیصد گر کر 4,381.60 ڈالر فی اونس رہے۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق گزشتہ ہفتے امریکی نان فارم پے رول کے کمزور اعدادوشمار کے باعث سونے میں نمایاں تیزی آئی تھی، تاہم موجودہ کمی منافع کے حصول کا قدرتی عمل ہے۔ ان کے بقول قلیل مدت میں سونے کی قیمت 4,300 ڈالر فی اونس سے اوپر رہنے کا امکان ہے۔

امریکی اعدادوشمار کے مطابق جولائی میں معیشت سے غیر متوقع طور پر ملازمتیں کم ہوئیں، جبکہ گزشتہ دو ماہ کے روزگار کے اعدادوشمار میں بھی نمایاں کمی کی گئی۔ اس کے بعد مارکیٹ میں ستمبر میں فیڈرل ریزرو کی جانب سے شرح سود برقرار رکھنے کی توقعات بڑھ گئی ہیں۔

اس ہفتے بدھ کو امریکی کنزیومر پرائس انڈیکس (سی پی آئی) اور جمعرات کو پروڈیوسر پرائس انڈیکس (پی پی آئی) جاری ہوگا۔ تجزیہ کاروں کے مطابق اگر مہنگائی کے اعدادوشمار توقعات سے کم رہے تو شرح سود میں اضافہ مؤخر ہونے کے امکانات مضبوط ہوں گے، جو سونے کی قیمتوں کے لیے مثبت ثابت ہو سکتا ہے۔

دوسری جانب ایران کی جانب سے آبنائے ہرمز سے متعلق پیش رفت اور مشرق وسطیٰ کی کشیدہ صورتحال بھی سرمایہ کاروں کی توجہ کا مرکز بنی ہوئی ہے۔ ادھر چاندی، پلاٹینم اور پیلیڈیم کی قیمتوں میں بھی معمولی کمی ریکارڈ کی گئی۔