محمد اورنگزیب کی امریکی وزیر خزانہ سے ملاقات، معاشی تعاون بڑھانے کا مطالبہ

پاکستان نے اقتصادی اصلاحات کے ایجنڈے کے لیے امریکا سے مزید تعاون کی درخواست کی ہے، جبکہ وفاقی وزیر خزانہ محمد اورنگزیب نے واشنگٹن ڈی سی میں امریکی وزیر خزانہ اسکاٹ بیسنٹ اور امریکی انٹرنیشنل ڈویلپمنٹ فنانس کارپوریشن (ڈی ایف سی) کے نمائندوں سے الگ الگ ملاقاتیں کیں۔

امریکی وزیر خزانہ سے ملاقات کے دوران محمد اورنگزیب نے پاکستان کی معیشت کے میکرو اکنامک استحکام سے پائیدار اور برآمدات پر مبنی ترقی کی جانب سفر کو اجاگر کیا، جبکہ اس بات کی نشاندہی بھی کی کہ علاقائی جغرافیائی سیاسی صورتحال معیشت کو متاثر کرنے کی صلاحیت رکھتی ہے۔

بدھ کو جاری بیان کے مطابق محمد اورنگزیب نے پاکستان کی مارکیٹ تک رسائی کے سفر کے لیے امریکا سے زیادہ تعاون کی درخواست کی، جس میں بین الاقوامی سرمایہ منڈیوں تک بہتر رسائی، زرمبادلہ کے ذخائر میں اضافہ اور پاکستان کی خودمختار کریڈٹ ریٹنگ میں بہتری شامل ہے۔

دونوں فریقوں نے دوطرفہ اقتصادی تعاون کو مزید مضبوط بنانے، امریکی سرمایہ کاری میں اضافے اور اسٹریٹجک منصوبوں کو آگے بڑھانے کے عزم کا اعادہ بھی کیا۔

دریں اثنا، وزیر خزانہ نے واشنگٹن میں امریکی انٹرنیشنل ڈویلپمنٹ فنانس کارپوریشن (ڈی ایف سی) کے نمائندوں سے ملاقات میں نجی شعبے کی قیادت میں چلنے والے ترجیحی منصوبوں کے لیے تیز رفتار معاونت کی درخواست کی۔

انہوں نے کہا کہ توانائی، انفارمیشن ٹیکنالوجی، انفراسٹرکچر، معدنیات، خوراک اور زراعت کے شعبوں میں سرمایہ کاری پاکستان کی ترقیاتی ترجیحات کا اہم حصہ ہے۔

محمد اورنگزیب نے نشاندہی کی کہ بندرگاہوں، ٹیلی کمیونیکیشن، آئی ٹی، توانائی، معدنیات، دواسازی، مینوفیکچرنگ اور سپلائی چین کی ترقی پر ڈی ایف سی کی توجہ پاکستان کی ترقیاتی ترجیحات سے مکمل ہم آہنگی رکھتی ہے۔

انہوں نے ڈی ایف سی کے ایک وفد کو پاکستان کا دورہ کرنے کی دعوت بھی دی تاکہ سرمایہ کاری کے قابل منصوبوں کی نشاندہی کی جا سکے اور متعلقہ فریقوں کے ساتھ مل کر قابل عمل کاروباری منصوبے تیار کیے جا سکیں۔

بیان کے مطابق، ملاقات میں پاکستان میں ڈی ایف سی کے نمائندہ دفتر کے قیام اور مستقبل میں آنے والے امریکی کانگریسی وفود کے ساتھ روابط کے امکانات پر بھی تبادلہ خیال کیا گیا۔