وزیراعظم آج سے ایران اور ترکیہ کے سرکاری دورے پر روانہ ہوں گے

دفتر خارجہ کے ترجمان نے جمعرات کو اعلان کیا ہے کہ وزیراعظم محمد شہباز شریف 3 سے 5 جولائی 2026 تک اسلامی جمہوریہ ایران اور جمہوریہ ترکیہ کے سرکاری دورے کریں گے۔

وزیراعظم کے ہمراہ نائب وزیراعظم و وزیر خارجہ سینیٹر محمد اسحاق ڈار، دیگر وفاقی وزرا اور اعلیٰ حکام بھی ہوں گے۔

وزیراعظم شہباز شریف ایران جائیں گے جہاں وہ مرحوم سپریم لیڈر آیت اللہ سید علی خامنہ ای کی نمازِ جنازہ اور تدفین کی تقریبات میں شرکت کریں گے۔ وزیراعظم ایرانی قیادت اور سوگوار خاندانوں سے پاکستانی عوام اور حکومت کی جانب سے تعزیت کا اظہار کریں گے اور اس گہرے غم کی گھڑی میں برادر ایرانی قوم کے ساتھ پاکستان کی مکمل یکجہتی کا اعادہ کریں گے۔

بعد ازاں وزیراعظم، ترکیہ کے صدر رجب طیب اردوان کی دعوت پر استنبول جائیں گے، جہاں وہ دونوں برادر ممالک کے درمیان دوطرفہ تعلقات کے تمام پہلوؤں پر بات چیت کریں گے۔ مذاکرات میں خاص طور پر باہمی تجارت اور سرمایہ کاری کے فروغ پر توجہ دی جائے گی، جبکہ علاقائی امن و سلامتی سے متعلق امور بھی زیر غور آئیں گے۔

دفتر خارجہ کے ترجمان کے مطابق استنبول میں قیام کے دوران وزیراعظم پاکستان کی میزبانی میں منعقد ہونے والی ایک بزنس کانفرنس سے بھی خطاب کریں گے، جس میں خصوصی اقتصادی زونز (ایس ای زیڈز)، توانائی، انفارمیشن ٹیکنالوجی (آئی ٹی) اور نجکاری سمیت ترجیحی شعبوں میں پاکستان کی تجارت اور سرمایہ کاری کی صلاحیت کو اجاگر کیا جائے گا۔ اس کانفرنس میں ترکیہ کی معروف کاروباری شخصیات، سرمایہ کار، اعلیٰ سرکاری حکام اور دیگر ممتاز شرکا شرکت کریں گے۔

کاپی رائٹ بزنس ریکارڈر، 2026