سرکاری ملازمین کے لیے ماحول دوست ہاؤسنگ اسکیموں کا آغاز

فیڈرل گورنمنٹ ایمپلائز ہاؤسنگ اتھارٹی (ایف جی ای ایچ اے) نے وفاقی دارالحکومت کے سیکٹرز F-14 اور F-15 کو پاکستان کا جدید ترین اور ماحول دوست رہائشی منصوبہ بنانے کے لیے عملی اقدامات کا آغاز کر دیا ہے۔

ہاؤسنگ منسٹری کے احکامات پر اتھارٹی کی تکنیکی ٹیم نے باغبانی اور لینڈ اسکیپنگ کے جامع منصوبے پر کام تیز کر دیا ہے۔ اس سلسلے میں سی ڈی اے کے ماہر ڈاکٹر پرویز احسن خان نے انجینئرز کے ہمراہ ان سیکٹرز کا دورہ کیا اور ماحولیاتی بہتری کے لیے تکنیکی سفارشات پیش کیں۔

منصوبے کے تحت بارش کا پانی محفوظ کرنے کے لیے چیک ڈیمز اور ہزاروں پودوں کی کاشت کے لیے نرسریاں قائم کی جائیں گی۔ رہائشیوں کے لیے سائیکلنگ ٹریکس، جھیل، بوٹنگ اور واک ویز بنائے جائیں گے، جبکہ سیکٹر F-14 میں موجود قدرتی غار اور جھیل کو بھی محفوظ کیا جائے گا۔ ڈی جی ایف جی ای ایچ اے کا کہنا ہے کہ یہ منصوبہ اسلام آباد کا بہترین اور ماڈل رہائشی علاقہ بنے گا۔

کاپی رائٹ بزنس ریکارڈر 2026