فکسڈ ٹیکس آسان اسکیم تاریخی سنگ میل ہے، پی بی آئی ایف

پاکستان بزنس مین اینڈ انٹلیکچولز فورم کے صدر میاں زاہد حسین نے تاجروں کے لیے حکومت کی نئی فکسڈ ٹیکس آسان اسکیم کا خیرمقدم کرتے ہوئے اسے معیشت کو دستاویزی بنانے اور ٹیکس نیٹ بڑھانے کی جانب ایک تاریخی سنگ میل قرار دیا ہے۔

انہوں نے کہا کہ تاجر دوست اسکیم کی ناکامی سے سبق سیکھ کر یہ اسکیم تاجر برادری کی مشاورت سے بنائی گئی ہے جس کے بہترین نتائج ملیں گے۔ ملک کے 44 لاکھ تاجروں میں سے صرف 3 لاکھ ٹیکس ریٹرن فائل کرتے ہیں، جبکہ ہول سیل اور ریٹیل سیکٹر کا جی ڈی پی میں حصہ 18 فیصد ہے لیکن ٹیکس میں صرف 4 فیصد ہے۔ یہ اسکیم 35 لاکھ چھوٹے تاجروں کو ٹیکس نیٹ میں لائے گی۔

اسکیم کے تحت 20 کروڑ روپے تک سالانہ ٹرن اوور والے تاجروں پر صرف ایک فیصد فکسڈ ٹیکس، مقامی زبانوں میں آسان فارمز اور آڈٹ و پوائنٹ آف سیل (پی او ایس) سے استثنیٰ جیسے اقدامات ایف بی آر کی جانب سے ہراساں کیے جانے کا خوف ختم کریں گے۔ مزید برآں دکانوں پر کیو آر کوڈ پلیٹس لگانے سے ٹیکس انسپکٹرز کا داخلہ بند ہوگا جبکہ اسکیم سے باہر رہنے والوں پر سخت جرمانے عائد کیے جائیں گے۔