بلوچستان میں سیکیورٹی فورسز کی کارروائیاں، 17 دہشتگردوں کو ہلاک کر دیا گیا

پاک فوج کے شعبہ تعلقاتِ عامہ (آئی ایس پی آر) نے منگل کے روز کہا ہے کہ بلوچستان میں مختلف انٹیلی جنس بیسڈ کارروائیوں کے دوران 17 دہشتگردوں کو ہلاک کر دیا گیا ہے۔

آئی ایس پی آر کے مطابق یہ کارروائیاں گزشتہ ماہ کوئٹہ میں ٹرین پر ہونے والے خودکش حملے کے بعد کی گئیں، جس میں 30 سے زائد افراد جاں بحق ہوئے تھے۔

بیان میں کہا گیا کہ 24 مئی 2026 کے واقعے کے بعد سیکیورٹی فورسز نے بلوچستان کے اضلاع مستونگ، نوشکی، زہری، خضدار اور کیچ میں سلسلہ وار انٹیلی جنس بیسڈ آپریشنز کیے۔

آئی ایس پی آر کے مطابق کارروائیوں کے دوران سیکیورٹی فورسز نے دہشتگردوں کے متعدد ٹھکانوں کو مؤثر انداز میں نشانہ بنایا، جس کے بعد شدید فائرنگ کے تبادلے میں 17 دہشتگرد ہلاک ہو گئے، جن کا تعلق بھارت کی سرپرستی میں کام کرنے والے ’’فتنہ الہندوستان‘‘ سے بتایا گیا ہے۔

بیان میں مزید کہا گیا کہ ہلاک دہشتگرد علاقے میں متعدد کارروائیوں میں سرگرم رہے تھے، جبکہ ان کے قبضے سے اسلحہ، گولہ بارود اور بڑی مقدار میں دھماکہ خیز مواد اور تیار شدہ آئی ای ڈیز بھی برآمد کیے گئے ہیں۔

آئی ایس پی آر کے مطابق ان علاقوں میں کلیئرنس اور سینیٹائزیشن آپریشنز جاری ہیں۔ بیان میں کہا گیا کہ ’’عزمِ استحکام‘‘ کے وژن کے تحت انسدادِ دہشتگردی مہم بھرپور انداز میں جاری رہے گی، تاکہ ملک سے بیرونی سرپرستی میں ہونے والی دہشتگردی کے مکمل خاتمے کو یقینی بنایا جا سکے۔