کسی بھی حتمی معاہدے میں ایران کا جوہری پروگرام بند کرانا لازمی شرط ہوگی، ٹرمپ کی نیتن یاہو کو یقین دہانی

امریکی صدر ڈونلڈ ٹرمپ نے اسرائیلی وزیر اعظم بنجمن نیتن یاہو کو یقین دلایا ہے کہ وہ تہران کے ساتھ کسی بھی حتمی معاہدے کے لیے ایران کے جوہری پروگرام کے خاتمے کے اپنے مطالبے پر سختی سے قائم رہیں گے۔ یہ بات اتوار کو ایک سینئر اسرائیلی عہدیدار نے اے ایف پی کو بتائی۔

ہفتے کی رات دونوں رہنماؤں کے درمیان ہونے والی گفتگو کا حوالہ دیتے ہوئے عہدیدار نے بتایا کہ صدر ٹرمپ نے واضح کیا ہے کہ وہ ایران کے جوہری پروگرام کے خاتمے اور ایرانی سرزمین سے تمام افزودہ یورینیم کو ہٹانے کے اپنے دیرینہ مطالبے پر مذاکرات کے دوران ثابت قدم رہیں گے اور ان شرائط کے بغیر وہ کسی بھی حتمی معاہدے پر دستخط نہیں کریں گے۔

عہدیدار نے کہا کہ امریکہ آبنائے ہرمز کو دوبارہ کھولنے اور دیگر تصفیہ طلب متنازع مسائل پر ایک حتمی معاہدے کی طرف بات چیت شروع کرنے کے لیے مفاہمت کی یادداشت سے متعلق ہونے والے مذاکرات کے بارے میں اسرائیل کو مسلسل اپ ڈیٹ کر رہا ہے۔

عہدیدار نے مزید بتایا کہ گفتگو کے دوران نیتن یاہو نے اس بات پر زور دیا کہ اسرائیل لبنان سمیت تمام محاذوں پر خطرات کے خلاف اپنی کارروائی کی آزادی کو برقرار رکھے گا، جس پر صدر ٹرمپ نے اس اصول کے لیے اپنی حمایت کا اعادہ کیا۔