آذربائیجان پنجاب کے کلین انرجی منصوبوں میں سرمایہ کاری کے لیے تیار

آذربائیجان نے پنجاب میں فضلے سے بجلی بنانے ، سولرائزیشن اور بائیو گیس کے منصوبوں میں باہمی تعاون اور سرمایہ کاری میں گہری دلچسپی کا اظہار کیا ہے۔

ان خیالات کا اظہار وزیرِ پنجاب توانائی فیصل ایوب نے جمعہ کو محکمہ توانائی میں ایک اجلاس کی صدارت کرتے ہوئے کیا۔ صوبائی وزیر نے وزیرِ اعلیٰ پنجاب مریم نواز کے حالیہ دورۂ آذربائیجان کے دوران ہونے والی پیش رفت پر شرکاء سے تبادلہ خیال کیا اور اس حوالے سے بین الاقوامی تعاون کے امکانات کا جائزہ لیا۔

انہوں نے کہا کہ پنجاب کو آذربائیجان کے ماڈل سے مائل (متاثر) ہو کر فضلے سے بجلی بنانے (ویسٹ ٹو انرجی)، بائیو گیس، کلین کوکنگ اور متبادل توانائی کے جدید منصوبوں کو فروغ دینے کے لیے فوری طور پر ایک جامع اور عملی حکمتِ عملی کی ضرورت ہے۔

فیصل ایوب نے واضح کیا کہ ان منصوبوں کا مقصد عوام کو سستی بجلی فراہم کرنا، صنعتوں کیلئے استحکام کو یقینی بنانا اور صوبہ بھر میں ایک ماحول دوست توانائی کا نظام قائم کرنا ہے۔

اجلاس کے دوران حکام نے صوبائی وزیر کو محکمہ توانائی کے سالانہ ترقیاتی پروگرام برائے 27-2026 میں شامل 31 ترقیاتی اسکیموں کے بارے میں بریفنگ دی۔ ان منصوبوں میں 17 جاری اسکیمیں اور 14 نئے اقدامات شامل ہیں۔

اجلاس میں سرکاری عمارتوں، تعلیمی اداروں اور صنعتی شعبے میں سولرائزیشن (شمسی توانائی پر منتقلی) اور توانائی کی بچت کے اقدامات سے متعلق منصوبوں کا بھی جائزہ لیا گیا۔

حکام نے شرکاء کو بتایا کہ قائد اعظم سولر کمپنی کے تحت وہاڑی اور رحیم یار خان میں پائلٹ سولر پارک منصوبے شروع کیے جائیں گے۔

مزید برآں، لاہور میں مجوزہ 50 میگاواٹ کے ویسٹ ٹو انرجی (فضلے سے بجلی بنانے کے) منصوبے کو سندر انڈسٹریل اسٹیٹ سے منسلک کرنے کے لیے 132 کلو وولٹ (kV) کی ٹرانسمیشن لائن بھی تعمیر کی جائے گی۔

کاپی رائٹ بزنس ریکارڈر 2026