امریکہ-ایران امن معاہدے کی امید، سونے کی قیمتیں مستحکم

امریکہ اور ایران کے درمیان ممکنہ امن معاہدے سے متعلق مزید تفصیلات کے انتظار میں عالمی منڈی میں سونے کی قیمتیں جمعرات کو تقریباً مستحکم رہیں، جبکہ سرمایہ کار محتاط رویہ اختیار کیے ہوئے ہیں۔

اسپاٹ گولڈ کی قیمت 4,688.16 ڈالر فی اونس پر برقرار رہی۔ بدھ کے روز سونے کی قیمت میں تقریباً 3 فیصد اضافہ ہوا تھا، جس کے بعد یہ 27 اپریل کے بعد بلند ترین سطح پر پہنچ گئی۔ دوسری جانب جون کے لیے امریکی گولڈ فیوچرز 0.1 فیصد اضافے کے ساتھ 4,696.60 ڈالر فی اونس تک پہنچ گئے۔

ایران نے بدھ کو کہا تھا کہ وہ امریکی امن تجویز کا جائزہ لے رہا ہے۔ ذرائع کے مطابق اس تجویز کے تحت جنگ کے باضابطہ خاتمے کی بات کی گئی ہے، تاہم ایران کے جوہری پروگرام کی معطلی اور آبنائے ہرمز دوبارہ کھولنے جیسے اہم امریکی مطالبات تاحال حل طلب ہیں۔

ادھر امریکہ اور ایران کے درمیان جنگ بندی معاہدے کے قریب پہنچنے کی خبروں کے بعد عالمی اسٹاک مارکیٹس نئی بلند ترین سطح پر پہنچ گئیں، جبکہ ڈالر اور تیل کی قیمتوں میں کمی دیکھی گئی۔

معاشی اعداد و شمار کے مطابق اپریل میں امریکی نجی شعبے میں ملازمتوں میں توقعات سے زیادہ اضافہ ریکارڈ کیا گیا۔ اب سرمایہ کار جمعہ کو جاری ہونے والی امریکی ماہانہ روزگار رپورٹ کے منتظر ہیں، جس سے اندازہ لگایا جائے گا کہ آیا امریکی معیشت اب بھی مضبوط ہے یا لیبر مارکیٹ میں نرمی شرح سود میں کمی کی توقعات کو دوبارہ تقویت دے سکتی ہے۔

فیڈرل ریزرو حکام نے خبردار کیا ہے کہ ایران جنگ کے باعث مہنگائی کے طویل المدتی دباؤ اور عالمی سپلائی چین میں مسائل کے خدشات بڑھ رہے ہیں۔

دیگر قیمتی دھاتوں میں اسپاٹ سلور 0.2 فیصد کمی کے ساتھ 77.16 ڈالر فی اونس پر آ گیا، جبکہ پلاٹینم 0.1 فیصد اضافے کے ساتھ 2,062.50 ڈالر تک پہنچ گیا۔ پیلاڈیم کی قیمت 0.3 فیصد کمی کے بعد 1,533.25 ڈالر فی اونس رہی۔