متنازع ٹاس کے بعد پاکستان شاہینز نے انڈیا اے کے خلاف 313 رنز بنا لیے
- معاذ صداقت، حسن نواز اور فرحان یوسف کی نصف سنچریاں، پاکستان شاہینز نے انڈیا اے کے خلاف 313 رنز کا مضبوط مجموعہ اسکور کرلیا
پاکستان شاہینز نے اے سی سی مینز ایشیا کپ رائزنگ اسٹارز 2026 کے گروپ بی کے دوسرے میچ میں اتوار کو انڈیا اے کے خلاف 49.2 اوورز میں 313 رنز بنائے۔ پاکستان کی جانب سے معاذ صداقت، حسن نواز اور فرحان یوسف نے نصف سنچریاں اسکور کیں۔
پاکستانی اننگز کا آغاز جارحانہ انداز میں ہوا، اوپنرز شمائل حسین اور معاذ صداقت نے بھارتی بولرز پر دباؤ برقرار رکھتے ہوئے پانچویں اوور میں 50 رنز کی شراکت مکمل کی۔
شمائل حسین 23 گیندوں پر 33 رنز بنا کر آؤٹ ہوئے، جبکہ معاذ صداقت نے 63 گیندوں پر 59 رنز اسکور کیے۔
وکٹ کیپر بیٹر روحیل نذیر صفر پر آؤٹ ہوئے، تاہم حسن نواز نے اننگز کو سنبھالتے ہوئے رنز کی رفتار تیز کی اور 82 گیندوں پر 79 رنز کی عمدہ اننگز کھیلی۔
کپتان عبدالصمد نے 35 گیندوں پر 28 رنز بنائے، جبکہ فرحان یوسف نے 48 گیندوں پر 56 رنز بنا کر اسکور میں مزید اضافہ کیا۔
محمد عمران نے 14 گیندوں پر تیزی سے 23 رنز بنائے، جبکہ سعد مسعود اور احمد دانیال نے بالترتیب 9 اور 8 رنز اسکور کیے۔ سفیان مقیم 3 رنز بنا کر ناٹ آؤٹ رہے، جبکہ علی رضا نے 2 رنز بنائے۔
انڈیا اے کی جانب سے ہرشت رانا، پرنس یادو، سورینش شیڈگے اور وپراج نگم نے دو، دو وکٹیں حاصل کیں، جبکہ آیوش بادونی نے ایک کھلاڑی کو آؤٹ کیا۔
اس سے قبل ویسٹ اینڈ پارک انٹرنیشنل کرکٹ اسٹیڈیم میں متنازع ٹاس کے باعث میچ کا آغاز غیر معمولی صورتحال میں ہوا۔
بھارت اے کے کپتان تلک ورما نے سکہ اچھالا، جبکہ پاکستان کے کپتان عبدالصمد نے ٹاس کے لیے ہیڈز کا انتخاب کیا۔ تاہم میچ ریفری نے ابتدائی طور پر ٹیلز قرار دیا، جس پر دونوں کپتانوں نے سکے کا جائزہ لیا۔
عبدالصمد نے فیصلے میں غلطی کی نشاندہی کی، جس کے بعد حکام نے دوبارہ ٹاس چیک کیا اور پاکستان کے حق میں فیصلہ درست قرار دیا۔ عبدالصمد نے ٹاس جیت کر پہلے بیٹنگ کا فیصلہ کیا۔ دونوں کپتانوں کے مطابق پچ قدرے خشک تھی۔
ٹاس کے بعد دونوں ٹیموں کے کھلاڑیوں نے ایک دوسرے سے ہاتھ بھی نہیں ملایا۔ یہ روایت پاکستان اور بھارت کے درمیان حالیہ مقابلوں میں بھی برقرار رہی ہے۔





















Comments