اٹک ریفائنری میں آپریشنز معمول پر آنا شروع، تیل کی سپلائی بحال

اٹک ریفائنری لمیٹڈ (اے آر ایل) نے جمعرات کو اعلان کیا ہے کہ خام تیل کی وصولی اور آئل ٹینکرز کے ذریعے مصنوعات کی ترسیل معمول پر آنا شروع ہو گئی ہے۔

لسٹڈ ریفائنری نے اس پیش رفت سے متعلق پاکستان اسٹاک ایکسچینج کو ایک نوٹس کے ذریعے آگاہ کیا۔

بدھ کو اٹک ریفائنری لمیٹڈ نے کہا تھا کہ اس نے 32,400 بیرل فی اسٹریم ڈے (بی پی ایس ڈی) کی گنجائش رکھنے والے اپنے مرکزی کروڈ ڈسٹلیشن یونٹ (ایچ بی یو-ون) کو بند کردیا ہے۔

نوٹس میں کہا گیا کہ اسلام آباد میں غیر ملکی وفود کی متوقع آمد کے باعث اٹک ریفائنری سے آئل ٹینکرز کی آمد و رفت اچانک معطل کر دی گئی تھی۔

کمپنی نے بیان کیا کہ اس صورتحال نے خام تیل کی وصولی اور مصنوعات کی ترسیل کو بری طرح متاثر کیا جس کا براہ راست اثر ریفائنری کے آپریشنز پر پڑا۔

اسٹاک ایکسچینج کو بھیجے گئے نوٹس میں کمپنی نے بتایا کہ متعلقہ حکام کی مداخلت اور تعاون کے بعد صورتحال معمول پر آنا شروع ہو گئی ہے۔

اسٹاک مارکیٹ کو مطلع کیا گیا کہ ہمیں توقع ہے کہ آئندہ چند دنوں میں معمول کے آپریشنز دوبارہ بحال ہو جائیں گے۔

اٹک ریفائنری پاکستان میں 8 نومبر 1978 کو ایک پرائیویٹ لمیٹڈ کمپنی کے طور پر رجسٹر ہوئی اور 26 جون 1979 کو اسے پبلک کمپنی میں تبدیل کر دیا گیا۔ اس کا بنیادی کام خام تیل کی ریفائننگ ہے۔

یہ کمپنی اٹک آئل کمپنی لمیٹڈ (انگلینڈ) کی ذیلی کمپنی ہے جبکہ اس کی حتمی پیرنٹ کمپنی کورل ہولڈنگ لمیٹڈ ہے (جو مالٹا میں رجسٹرڈ ایک پرائیویٹ لمیٹڈ کمپنی ہے)۔