آبنائے ہرمز سے ہفتے کو 20 سے زائد جہاز گزر گئے، کپلر ڈیٹا

آبنائے ہرمز میں کشیدگی کے باوجود ہفتے کے روز بحری سرگرمیوں میں نمایاں اضافہ دیکھنے میں آیا، جہاں 20 سے زائد جہاز اس اہم آبی گزرگاہ سے گزرے۔ شپنگ تجزیاتی ادارے کپلر کے مطابق یکم مارچ کے بعد یہ سب سے بڑی تعداد ہے، جو خطے میں جزوی بحالی کی نشاندہی کرتی ہے۔

گزرنے والے جہازوں میں مختلف نوعیت کا کارگو شامل تھا، جن میں تیل، مائع پیٹرولیم گیس (ایل پی جی)، دھاتیں اور کھاد شامل ہیں۔ ان میں سے پانچ جہاز ایسے تھے جنہوں نے ایران سے لوڈنگ کی تھی، جبکہ تین ایل پی جی بردار جہاز چین اور بھارت کی جانب روانہ ہوئے۔

پاناما کے پرچم تلے چلنے والا ٹینکر کریو متحدہ عرب امارات سے ایل پی جی لے کر انڈونیشیا جا رہا تھا۔ اسی طرح اکٹی اے اور اتھینا نامی دو ٹینکر بحرین سے ریفائنڈ مصنوعات لے کر بالترتیب موزمبیق اور تھائی لینڈ کی طرف روانہ ہیں۔

لائبیریا کے پرچم والا ٹینکر نیویگیٹ میکالسٹر تقریباً 5 لاکھ بیرل نیفتھا لے کر جنوبی کوریا کی بندرگاہ اولسان جا رہا ہے، جبکہ ایف پی ایم سی سی لارڈ نامی ایک بڑے آئل ٹینکر میں سعودی عرب کا تقریباً 20 لاکھ بیرل خام تیل لدا ہوا ہے جو تائیوان کی میلاؤ بندرگاہ کی طرف جا رہا ہے۔

مزید برآں، بھارتی پرچم بردار جہاز دیش گریما متحدہ عرب امارات کا خام تیل لے کر سری لنکا روانہ ہے، جبکہ روبی نامی جہاز قطر کی کھاد یو اے ای پہنچا رہا ہے۔ ایک بلک کیریئر میری ایم سعودی عرب سے پیٹرولیم کوک لے کر اٹلی جا رہا ہے۔

یہ پیش رفت ظاہر کرتی ہے کہ خطرات کے باوجود عالمی تجارت جزوی طور پر جاری ہے۔