یورپی ممالک، جاپان اور کینیڈا نے آبنائے ہرمز پر مشترکہ بیان جاری کردیا

برطانیہ، فرانس، جرمنی، اٹلی، نیدرلینڈز، جاپان اور کینیڈا نے جمعرات کو مشترکہ بیان جاری کرتے ہوئے کہا کہ وہ آبنائے ہرمز میں محفوظ گزرگاہ یقینی بنانے کی مناسب کوششوں میں حصہ لینے کے لیے تیار ہیں اور توانائی کی منڈیوں کو مستحکم کرنے کے اقدامات کریں گے۔

بیان میں ایران کے خلیج میں غیر مسلح تجارتی جہازوں پر حالیہ حملوں، شہری بنیادی ڈھانچے بشمول تیل اور گیس کی تنصیبات پر حملوں اور ایران کی جانب سے آبنائے ہرمز کے عملی طور پر بند کرنے کی شدید مذمت کی گئی۔

یورپی اور ایشیائی ممالک نے بڑھتے ہوئے تنازع پر گہری تشویش کا اظہار کرتے ہوئے ایران سے فوری طور پر دھمکیوں، بارودی سرنگیں بچھانے، ڈرون اور میزائل حملوں اور تجارتی جہاز رانی میں رکاوٹ ڈالنے کی کوششیں بند کرنے اور اقوام متحدہ کی سلامتی کونسل کی قرارداد 2817 پر عمل درآمد کرنے کا مطالبہ کیا۔

بیان میں کہا گیا کہ جہاز رانی کی آزادی بین الاقوامی قانون کے بنیادی اصولوں میں شامل ہے اور ایران کی کارروائیوں کے اثرات دنیا کے ہر حصے میں محسوس کیے جائیں گے، خاص طور پر سب سے زیادہ کمزور افراد پر اثرات پڑیں گے۔

ان ممالک نے شہری بنیادی ڈھانچے بشمول تیل اور گیس کی تنصیبات پر حملوں پر فوری مکمل پابندی لگانے کا مطالبہ بھی کیا۔

بیان میں یہ بھی کہا گیا کہ وہ آبنائے ہرمز میں محفوظ گزرگاہ یقینی بنانے کے لیے تیار ہیں اور اس ضمن میں تیاری میں مصروف ممالک کی کاوشوں کو سراہا۔

مزید برآں، انہوں نے انٹرنیشنل انرجی ایجنسی کے اس فیصلے کا خیرمقدم کیا جس میں اسٹریٹجک پیٹرولیم ریزروز کی مشترکہ جاری کرنے کی اجازت دی گئی اور توانائی کی منڈیوں کو مستحکم کرنے کے لیے پیداوار بڑھانے سمیت دیگر اقدامات کرنے کا عندیہ دیا۔

بیان میں کہا گیا کہ وہ سب سے زیادہ متاثرہ ممالک کو اقوام متحدہ اور بین الاقوامی مالیاتی اداروں کے ذریعے معاونت فراہم کرنے کے لیے بھی کام کریں گے اور عالمی بحری سلامتی اور جہاز رانی کی آزادی کے عالمی فوائد کو برقرار رکھنے پر زور دیا گیا۔