لوٹے کیمیکل کا اینگرو پولیمر کے اکثریتی حصص اور انتظامی کنٹرول حاصل کرنے کا فیصلہ

لوٹے کیمیکل پاکستان لمیٹڈ نے اینگرو پولیمر اینڈ کیمیکلز لمیٹڈ کے حصص (شیئرز) خریدنے اور اس کا انتظام سنبھالنے کے ارادے کا اعلان کیا ہے۔

اس پیشکش کے منیجر کے طور پر مقرر کردہ عارف حبیب لمیٹڈ نے منگل کو پاکستان اسٹاک ایکسچینج کو ایک نوٹس کے ذریعے اس (خریداری کے) ارادے سے آگاہ کیا۔

پبلک اناؤنسمنٹ آف انٹینشن (پی اے آئی) کے مطابق خریدار کمپنی کا ارادہ اینگرو پولیمر کے تقریباً 73.69 فیصد حصص اور انتظامی کنٹرول حاصل کرنا ہے۔ یہ خریداری شیئر پرچیز ایگریمنٹ (ایس پی اے) اور عام حصص یافتگان (شیئر ہولڈرز) کو دی جانے والی عوامی پیشکش کے مشترکہ عمل کے ذریعے مکمل کی جائے گی۔

مجوزہ لین دین کے تحت اینگرو پولیمر کے 510,733,451 حصص جو کہ کمپنی کے کل ادا شدہ سرمائے (پیڈ اپ کیپٹل) کا تقریباً 56.19 فیصد بنتے ہیں، شیئر پرچیز ایگریمنٹ کے ذریعے حاصل کیے جائیں گے جبکہ بقیہ 159,094,941 حصص (جو کہ ہدف شدہ کمپنی کے ادا شدہ سرمائے کا 17.5 فیصد ہیں) کے لیے عام حصص یافتگان کو پبلک آفر (عوامی پیشکش) دی جائے گی۔

اینگرو پولیمر اینڈ کیمیکلز لمیٹڈ پاکستان میں پی وی سی اور اس سے متعلقہ کیمیکل مصنوعات تیار کرنے والے صفِ اول کے اداروں میں سے ایک ہے۔ اس پیشکش کی مالیت اور ڈھانچے کے بارے میں مزید تفصیلات آنے والے اعلانات میں ظاہر کیے جانے کی توقع ہے۔

گزشتہ ماہ ٹوکیو میں قائم عالمی کاروباری ادارے مٹسوبشی کارپوریشن نے اینگرو پولیمر اینڈ کیمیکلز لمیٹڈ میں اپنے 11.007 فیصد کے اقلیتی حصص فروخت کرنے پر اتفاق کیا تھا۔

دریں اثنا لوٹے کیمیکل پاکستان لمیٹڈ پیوریفائیڈ ٹیرفتھالک ایسڈ تیار اور فروخت کرتی ہے اور کراچی کے پورٹ قاسم پر ایک جدید ترین پلانٹ چلاتی ہے، جس کی سالانہ پیداواری صلاحیت 5 لاکھ ٹن ہے۔