بعلبک میں رہائشی عمارت پر اسرائیلی حملہ، کم از کم 4 افراد جاں بحق

لبنان کے مشرقی شہر بعلبک میں ایک چار منزلہ رہائشی عمارت پر اسرائیلی حملے کے نتیجے میں کم از کم چار افراد جاں بحق اور چھ زخمی ہو گئے۔ سرکاری خبر رساں ایجنسی این این اے کے مطابق امدادی ٹیمیں ملبے تلے دبے خاندانوں کو نکالنے کے لیے کارروائیاں جاری رکھے ہوئے ہیں۔

یہ حملہ پیر سے لبنان۔اسرائیل سرحد پر جاری شدید کشیدگی کا حصہ ہے، جس کا آغاز حزب اللہ کی جانب سے اسرائیل پر ڈرون اور میزائل حملوں سے ہوا۔ اس کے بعد ایران نواز گروپ نے مزید راکٹ فائر کیے، جبکہ اسرائیل نے لبنان کے مختلف علاقوں میں فضائی حملوں کی لہر شروع کر دی اور جنوبی لبنان میں زمینی دستے بھی بھیج دیے۔

حزب اللہ، جسے 1982 میں ایران کی پاسداران انقلاب نے قائم کیا تھا، نے مشترکہ امریکی۔اسرائیلی کارروائی میں ایران کے سپریم لیڈر کی شھادت کے ردعمل میں اسرائیل پر حملے شروع کیے۔ تنظیم نے بدھ کو کہا کہ اس کے جنگجوؤں نے میٹولا کے قریب اسرائیلی فوجیوں کے اجتماع پر راکٹوں کی بوچھاڑ کردی۔

ادھر اسرائیلی فوج نے لبنان کے 16 دیہات کے رہائشیوں کو علاقہ خالی کرنے کی وارننگ دی ہے۔ لبنان کی وزارت صحت کے مطابق تازہ کشیدگی کے دوران اسرائیلی حملوں میں کم از کم 50 افراد جاں بحق اور 335 زخمی ہو چکے ہیں۔