ایران پر امریکی و اسرائیلی حملوں کے بعد چین کا فوری جنگ بندی کا مطالبہ
- ایران کی خودمختاری، سلامتی اور علاقائی سالمیت کا احترام کیا جانا چاہیے، چینی وزارت خارجہ
چین نے ایران پر امریکہ اور اسرائیل کے حالیہ فوجی حملوں پر گہری تشویش ظاہر کرتے ہوئے فوری جنگ بندی کا مطالبہ کیا ہے۔ چینی وزارتِ خارجہ نے تمام فریقین پر زور دیا ہے کہ وہ کشیدگی ختم کر کے مذاکرات کی میز پر آئیں۔ ہفتے کے روز ہونے والے ان حملوں میں ایران کی فوجی تنصیبات کو نشانہ بنایا گیا، جس کے نتیجے میں ایرانی سرکاری میڈیا نے سپریم لیڈر آیت اللہ علی خامنہ ای کی شہادت کی تصدیق کی ہے۔
چین کی سرکاری نیوز ایجنسی شینہوا نے اس کارروائی کو خودمختار ملک کے خلاف کھلی جارحیت اور اقوامِ متحدہ کے چارٹر کی سنگین خلاف ورزی قرار دیا ہے۔ دوسری جانب بیجنگ نے ایران اور اسرائیل میں موجود اپنے شہریوں کو ہنگامی بنیادوں پر ملک چھوڑنے یا محفوظ مقامات پر منتقل ہونے کی ہدایت جاری کر دی ہے۔
علاقائی کشیدگی کے باعث ہانگ کانگ کی کیتھے پیسیفک ایئر لائن نے بھی مشرقِ وسطیٰ کے لیے اپنی تمام پروازیں معطل کر دی ہیں۔ چین کا موقف ہے کہ ایران کی خودمختاری اور علاقائی سالمیت کا ہر صورت احترام کیا جانا چاہیے۔
Comments
Comments are closed.