وفاقی وزیر خزانہ اور صدر ویزا گروپ کے درمیان ادائیگیوں کے شعبے میں جدت لانے پر تبادلہ خیال

وفاقی وزیر خزانہ اور محصولات محمد اورنگزیب نے ڈیووس میں ویزا گروپ کے صدر اولیور جینکن سے ملاقات کی، جس میں ڈیجیٹل ادائیگیوں میں جدت اور پاکستان کی جدید، ڈیجیٹل طور پر بااختیار معیشت کی جانب منتقلی پر تبادلہ خیال کیا گیا۔

فنانس ڈویژن کے بیان کے مطابق یہ ملاقات ورلڈ اکنامک فورم کے سالانہ اجلاس کے موقع پر ہوئی، جہاں دونوں فریقین نے پاکستان کے بدلتے ہوئے معاشی منظر نامے اور عالمی ادائیگی کے نیٹ ورکس کے ساتھ اس کے تعاون کا جائزہ لیا۔

ویزا کے صدر نے پاکستان کے ساتھ طویل مدتی وابستگی کا اعادہ کیا اور محفوظ ادائیگی کے حل، جدت اور علم کی منتقلی کے ذریعے ملک کی ترقی کے اگلے مرحلے میں تعاون فراہم کرنے میں گہری دلچسپی کا اظہار کیا۔

اولیور جینکن نے ڈیجیٹل ادائیگیوں کی جانب عالمی رجحان کو اجاگر کیا اور جدت کو وسعت دینے کے لیے پالیسی کی وضاحت اور ایک سازگار ماحول کی اہمیت پر زور دیا۔

وزیر خزانہ نے ویزا کے مسلسل تعاون کا خیرمقدم کرتے ہوئے کہا کہ پالیسی کا تسلسل اور اصلاحات کا واضح روڈ میپ پاکستان کی معاشی حکمت عملی کا مرکز ہے۔ انہوں نے اس بات پر زور دیا کہ حکومت نجی شعبے کی شرکت کی حوصلہ افزائی کے لیے ڈیجیٹل ایکو سسٹم بشمول کنیکٹیویٹی، مالیاتی ڈھانچے اور ریگولیٹری فریم ورک کو مضبوط بنانے کے لیے کام کر رہی ہے۔

محمد اورنگزیب نے کہا کہ عالمی ادائیگی کے نیٹ ورکس اور مقامی حل کے درمیان اشتراک ملک بھر میں مالیاتی شمولیت اور ڈیجیٹل طرزِ زندگی کو تیز کرنے میں کلیدی کردار ادا کرے گا۔ انہوں نے معیشت کی دستاویز سازی اور شفافیت کے لیے جاری کوششوں کا ذکر کرتے ہوئے کہا کہ ان اصلاحات سے قابلِ اعتماد عالمی شراکت داروں کے لیے نئے مواقع پیدا ہو رہے ہیں۔

ملاقات کے اختتام پر دونوں فریقوں نے ڈیجیٹل فنانس کے عالمی ارتقاء کے ساتھ مل کر کام کرنے پر اتفاق کیا اور اس اعتماد کا اظہار کیا کہ یہ تعاون آنے والے برس میں عملی اور مارکیٹ کے لیے تیار حل پیش کرے گا۔