ڈاکٹر کبیر احمد سدھو ایس ای سی پی کے نئے چیئرمین مقرر

حکومت نے ڈاکٹر کبیر احمد سدھو کو فوری طور پر سیکیورٹیز اینڈ ایکسچینج کمیشن آف پاکستان (ایس ای سی پی ) کا چیئرمین مقرر کردیا ہے۔

نوٹیفکیشن کے مطابق سیکیورٹیز اینڈ ایکسچینج کمیشن آف پاکستان ایکٹ 1997 (1997 کا XLII) کے سیکشن 6 کے تحت حاصل اختیارات کو بروئے کار لاتے ہوئے، وفاقی حکومت ڈاکٹر کبیر احمد سدھو کو فوری طور پر چیئرمین سیکیورٹیز اینڈ ایکسچینج کمیشن آف پاکستان مقرر کرتی ہے۔

ڈاکٹر کبیر احمد سدهو کی تعیناتی عاکف سعید کی جگہ کی گئی ہے۔

ڈاکٹر کبیر احمد سدھو نے لا میں اپنی بیچلرز ڈگری، بینکنگ، انشورنس اور انٹرنیشنل بزنس لاء میں ایل ایل ایم اور پی ایچ ڈی کی ڈگری یونیورسٹی آف مانچسٹر سے حاصل کی۔ انہوں نے مانچسٹر لاء سوسائٹی سے سول لٹیگیشن (سول مقدمہ بازی) میں پوسٹ گریجویٹ ڈپلوما اور لندن انسٹی ٹیوٹ آف بینکنگ اینڈ فنانس سے مارگیج اور مالیاتی مشاورت میں سرٹیفکیٹس بھی حاصل کر رکھے ہیں۔
ڈاکٹر کبیر احمد کے پاس مختلف شعبوں میں 20 سال سے زیادہ تجربہ ہے جس میں برطانیہ میں انشورنس کمپنیوں، لا فرمز، مالیاتی اداروں کے کمپلائنس ڈپارٹمنٹس اور پاکستان میں مختلف لا فرمز اور حکومتی وزارتوں میں کام کرنا شامل ہے۔

اس عہدے سے قبل وہ وزارت قانون میں سینئر لیگل کنسلٹنٹ کے طور پر کام کر رہے تھے۔