ڈی جی خان سیمنٹ کا پاکستان کی سب سے بڑی سنگل کلنکر پروڈکشن لائن قائم کرنے کا اعلان

ملک کی سب سے بڑی سیمنٹ کمپنیوں میں سے ایک ڈی جی خان سیمنٹ نے بدھ کو اعلان کیا ہے کہ اس نے پاکستان کی سب سے بڑی سنگل کلنکر پروڈکشن لائن لگانے کے لیے لیٹر آف کریڈٹ (ایل سی) کھول دیا ہے۔

کمپنی نے یہ پیشرفت پاکستان اسٹاک ایکسچینج کو بھیجی گئی نوٹس میں شیئر کی۔

نوٹس میں بتایا گیا ہے کہ کمپنی نے موضع خوفلی ستائی ڈیرہ غازی خان سائٹ پر یومیہ 11 ہزار ٹن کی پاکستان کی سب سے بڑی سنگل کلنکر پروڈکشن لائن (براؤن فیلڈ) لگانے کے لیے لیٹر آف کریڈٹ (ایل سی) قائم کر دیا ہے۔

1978 میں قائم ہونے والی ڈی جی خان سیمنٹ ، کلنکر، آرڈنری پورٹ لینڈ سیمنٹ اور سلفیٹ ریزسٹنٹ سیمنٹ کی تیاری اور فروخت کے کاروبار سے وابستہ ہے۔

ڈی جی خان سیمنٹ 2200 سے زائد ڈیلرز پر مشتمل ایک وسیع نیٹ ورک کے ذریعے ملک بھر کی مارکیٹوں میں اپنی مصنوعات فراہم کرتی ہے۔ اس کے علاوہ پڑوسی ممالک جیسے کہ بنگلہ دیش اور افغانستان، اور بیرونِ ملک وسطی افریقہ کی منڈیوں میں بھی اپنی مصنوعات برآمد کرتی ہے۔

دوسری جانب، پاکستان کی سیمنٹ برآمدات کمزور ہورہی ہیں، حالانکہ ملکی طلب معتدل استحکام کا مظاہرہ کر رہی ہے۔

آل پاکستان سیمنٹ مینوفیکچررز ایسوسی ایشن کے مطابق نومبر 2025 میں سیمنٹ برآمدات سالانہ بنیاد پر 26.53 فیصد کم ہو کر 590,183 ٹن رہ گئی، جو نومبر 2024 میں 803,258 ٹن تھی۔

یہ کمی پہلے سے تشویش ناک رجحان کو مزید تقویت دیتی ہے، اکتوبر میں 23 فیصد اور ستمبر میں 15 فیصد کی کمی دیکھی گئی تھی۔